Live Updates

ٓسندھ میں ممکنہ بارشوں اور سیلاب کا الرٹ، محکمہ زراعت ہائی الرٹ پر، افسران کی چھٹیاں منسوخ

جمعہ 29 اگست 2025 20:16

کراچی (اُردو پوائنٹ اخبارتازہ ترین - آن لائن۔ 29 اگست2025ء) سندھ میں ممکنہ شدید بارشوں اور سیلابی صورتحال کے پیش نظر صوبائی حکومت متحرک ہو گئی۔ محکمہ زراعت سندھ نے تمام افسران اور عملے کی چھٹیاں منسوخ کر کے ہنگامی پلان پر عملدرآمد شروع کر دیا ہے، جبکہ صوبے بھر میں ایمرجنسی سینٹرز اور کنٹرول رومز قائم کر دیے گئے ہیں تاکہ کسانوں کو فوری امداد فراہم کی جا سکے۔

وزیر زراعت سندھ سردار محمد بخش مہر کے مطابق حیدرآباد میںڈی جی ایگریکلچر ایکسٹینشن کے دفتر میں 24/7 رین ایمرجنسی سیل قائم کر دیا گیا ہے تاکہ کسان کسی بھی ہنگامی صورتحال میں فوری رابطہ کر سکیں۔ اس کے علاوہ، 30 اضلاع میں ڈائریکٹرز اور ڈپٹی ڈائریکٹرز کو فوک پرسن مقررکر دیا گیا ہے۔سندھ کے تمام اضلاع، تحصیلوں اور تپوں کی سطح پر ایمرجنسی مراکز قائم کیے گئے ہیں، جہاں افسران ہر وقت موجود رہیں گے۔

(جاری ہے)

کراچی، لاڑکانہ، سکھر، حیدرآباد، میرپورخاص، اور شہید بینظیرآباد سمیت تمام حساس علاقوں میں افسران کی حاضری یقینی بنانے کی ہدایت جاری کر دی گئی ہے۔ وزیر زراعت نے واضح ہدایات دی ہیں کہ کسانوں کو بیج، کھاد اور زرعی آلات پر مشتمل فوری امدادفراہم کی جائے گی۔ انہوں نے انجینئرنگ ونگ کو ہدایت کی ہے کہ اپنی مشینری اور بلڈوزر ہر وقت تیاری کی حالت میں رکھیں، تاکہ ضرورت پڑنے پر فوری کارروائی کی جا سکے۔

افسران کو PDMA اور دیگر متعلقہ اداروں سے مسلسل رابطے میں رہنے کی ہدایت بھی کی گئی ہے۔ تمام ضلعی افسران کو اپنے اضلاع میں الرٹ رہنے اور کسانوں سے براہ راست رابطے میں رہنے کی سختی سے تاکید کی گئی ہے، اور انہیں روزانہ کی بنیاد پر **سیکریٹری زراعت محمد زمان ناریجو** کو رپورٹ پیش کرنے کی ہدایت کی گئی ہے۔مزید برآں، کسانوں کی فوری مدد کے لیے ایک ہیلپ لائن ی فعال کر دی گئی ہے۔ وزیراعلیٰ سندھ کی ہدایت پر وزرائ کو دریائے سندھ کے لیفٹ بینک اور رائٹ بینکپر ڈیوٹیاں تفویض کر دی گئی ہیں تاکہ کسی بھی ممکنہ خطرے کی صورت میں فوری ردعمل ممکن ہو۔