کوہاٹ، نامعلوم افراد کا پولیس موبائل پر حملہ، ایک پولیس اہلکار شہید، 2 زخمی

ایمرجنسی کی اطلاع ریسکیو 1122 کوہاٹ کنٹرول روم کو موصول ہوتے ہی میڈیکل ٹیموں نے بروقت رسپانس کیا

ہفتہ 30 اگست 2025 15:11

کوہاٹ (اُردو پوائنٹ اخبارتازہ ترین - این این آئی۔ 30 اگست2025ء)کوہاٹ کے تحصیل لاچی کے علاقہ درملک پولیس چوکی کے قریب موبائل وین پر فائرنگ کا افسوسناک واقعہ پیش آیا جس کے نتیجے میں ایک پولیس اہلکار شہید اور 2 زخمی ہوگئے۔تفصیلات کے مطابق ریسکیو 1122 نے بتایا ہے کہ افسوسناک واقعہ کوہاٹ کی تحصیل لاچی میں پیش آیا، جہاں درملک پولیس چوکی پر موبائل وین کو نشانہ بنایا گیا،پولیس کی گاڑی پر نامعلوم افراد کی فائرنگ کے نتیجے میں ایک پولیس اہلکار موقع پر شہید ہوگیا جب کہ دو پولیس اہلکار زخمی ہوگئے۔

(جاری ہے)

ایمرجنسی کی اطلاع ریسکیو 1122 کوہاٹ کنٹرول روم کو موصول ہوتے ہی ریسکیو 1122 کی میڈیکل ٹیموں نے بروقت رسپانس کیا۔ریسکیو ٹیموں نے تمام پولیس اہلکاروں کو ابتدائی طبی امداد فراہم کرنے کے ساتھ ساتھ ٹائپ ڈی ہسپتال لاچی منتقل کیا گیا جہاں سے دو پولیس اہلکاروں کو ڈسٹرکٹ ہیڈکوارٹرز ہسپتال کوہاٹ منتقل کر دیا گیا۔آپریشن کی نگرانی سینئر ڈسٹرکٹ ایمرجنسی آفیسر کوہاٹ محمد عارف خٹک اور ایمرجنسی آفیسر حضرت نواب خان خود کررہے تھے ۔ترجمان ریسکیو 1122 کوہاٹ کا کہنا تھا کہ فائرنگ کے نتیجے میں اشفاق (پی ایس آئی) شہید ہوگئے جب کہ کانسٹیبل یاسر اور شفقت محمود زخمی ہوئے۔