جنوبی پنجاب سے فوڈ ایکسپورٹرز کا وفد شاہد عمران کی قیادت میں جدہ روانہ ہو گیا

اتوار 31 اگست 2025 13:30

لاہور (اُردو پوائنٹ اخبارتازہ ترین - اے پی پی۔ 31 اگست2025ء) جنوبی پنجاب سے فوڈ ایکسپورٹرز کا وفد سعودی ہم منصبوں کی دعوت پر اتوار کو جدہ روانہ ہو گیا۔ روانگی سے قبل یہاں صحافیوں سے گفتگو کرتے ہوئے وفد کے رہنما ایف پی سی سی آئی کی علاقائی کمیٹی برائے خوراک کے کنوینئر شاہد عمران نے کہا کہ دورے کا مقصد تجارتی روابط کو مزید مضبوط بنانا اور پاکستان کے اعلی معیار کے پراسیسڈ فوڈز بالخصوص اسنیکس کی نمائش کرنا ہے۔

(جاری ہے)

انہوں نے کہا کہ وفد سعودی عرب کے تجارتی شراکت داروں کے ساتھ سعودی ویژن 2030 کے تحت برآمدات کے نئے مواقع، مشترکہ منصوبوں کی نشاندہی اور سرمایہ کاری پر توجہ مرکوز کرے گا۔ سعودی عرب میں حلال پراڈکٹس کی بڑھتی ہوئی مانگ، ٹیکنالوجی کی منتقلی اور پاکستان کے فوڈ پراسیسنگ سیکٹر میں سرمایہ کاری پر بھی بات ہوگی۔ انہوں نے کہا کہ ہمارا یہ اقدام خلیجی ریاستوں میں غذائی مصنوعات کی برآمدات کو بڑھانے کے حکومتی ہدف سے ہم آہنگ ہے۔ انہوں نے امید ظاہر کی کہ اس دورے میں اہم معاہدے ہوں گے، پاکستان کی برآمدی آمدنی میں اضافہ اور زرعی غذائی مصنوعات کے شعبے میں طویل مدتی تعاون کو فروغ ملے گا۔