آئی ٹی کی برآمدات اوسطاً ماہانہ 317 ملین ڈالر سے زائد رہیں

پیر 1 ستمبر 2025 18:02

اسلام آباد (اُردو پوائنٹ اخبارتازہ ترین - اے پی پی۔ 01 ستمبر2025ء) خصوصی سرمایہ کاری سہولت کونسل(ایس آئی ایف سی )کی مؤثر حکمت عملی سے آئی ٹی برآمدات میں نمایاں اضافہ ہوا ہے، گذشتہ ایک سال کے دوران آئی ٹی کی برآمدات اوسطاً ماہانہ 317 ملین ڈالر سے زائد رہی ہیں۔ ایس ائی ایف سی کی کاوشوں سے عالمی مارکیٹ تک بہتر رسائی کی بدولت پاکستان کی آئی ٹی برآمدات میں اضافہ ہوا ہے اور جولائی 2025 میں 354 ملین ڈالر کی برآمدات کے ساتھ آئی ٹی برآمدات گزشتہ 12ماہ کی 317 ملین ڈالر کی اوسط سے تجاوز کر گئیں، آئی ٹی برآمدات میں گزشتہ سال جولائی کے مقابلے میں 24 فیصد جبکہ جون کے مقابلے میں 5 فیصد بہتری ریکارڈ کی گئی۔

واضح رہے کہ برآمدات میں اضافہ کمپیوٹر سروسز، سافٹ ویئر کنسلٹنسی اور خلیجی ممالک میں صارفین کے اضافے سے ممکن ہوا ہے۔

(جاری ہے)

سٹیٹ بینک آف پاکستان نے بھی ایکسپورٹرز کے سپیشلائزڈ فارن کرنسی اکاؤنٹس کی حد 35 فیصد سے بڑھا کر 50 فیصد کردی ہے اور سٹیٹ بینک کی جانب سے متعارف کرائی گئی ایکویٹی انویسٹمنٹ ابراڈ سکیم نے آئی ٹی برآمدکنندگان کے اعتماد میں اضافہ کیا ہے۔

سکیم کے تحت آئی ٹی برآمدکنندگان اپنی برآمدی وصولیوں کا 50 فیصد بیرونِ ملک سرمایہ کاری کے لئے استعمال کر سکتے ہیں۔ پاکستان سافٹ ویئر ہاؤسز ایسوسی ایشن کے سروے کے مطابق ملکی 62 فیصد آئی ٹی کمپنیاں سپیشلائزڈ فارن کرنسی اکاؤنٹس کی حامل ہیں، ایس آئی ایف سی کی معاونت سے پاکستان کی آئی ٹی انڈسٹری کی مسلسل ترقی پاکستان کے روشن مستقبل کی ضمانت ہے۔