Live Updates

سیلابی صورتِ حال ختم ہونے کے بعد نقصانات کا تخمینہ لگا کر ازالہ کیا جائے گا، مریم اورنگزیب

سیلاب سے ممکنہ متاثرہ اضلاع کو ہائی الرٹ کردیا، 20 لاکھ سے زائد افراد سیلاب کے باعث متاثر ہوئے، تاریخ کا سب سے بڑا ریسکیو آپریشن کیا گیا؛ سینئر صوبائی وزیر کی پریس کانفرنس

ساجد علی اتوار 31 اگست 2025 14:05

سیلابی صورتِ حال ختم ہونے کے بعد نقصانات کا تخمینہ لگا کر ازالہ کیا ..

لاہور( اُردو پوائنٹ اخبارتازہ ترین۔ 31 اگست2025ء ) پنجاب کی سینئر صوبائی وزیر مریم اورنگزیب نے کہا ہے کہ سیلاب سے متاثر ہونے والے متوقع اضلاع میں ہائی الرٹ کر دیا گیا ہے، اس وقت لوگوں کی جانیں بچانا سب سے بڑا کام ہے، 20 لاکھ سے زائد افراد سیلاب کے باعث متاثر ہوئے ہیں، ساڑھے 7 لاکھ افراد کو محفوظ مقام پر منتقل کیا گیا۔ پریس کانفرنس کرتے ہوئے انہوں نے کہا کہ پنجاب کی تاریخ میں سب سے بڑا ریسکیو آپریشن کیا گیا، 5 لاکھ سے مویشیوں کو محفوظ مقامات پر منتقل کیا گیا، 400 سے زائد وٹنری کیمپس لگائے گئے جہاں مویشیوں کے چارے کا بھی بندوبست کیا گیا، سیلاب سے متاثرہ علاقوں میں امدادی کارروائی جاری ہے، نالوں میں تجاوزات کے خاتمے کا سلسلہ بھی جاری ہے، سیلابی صورتِ حال ختم ہونے کے بعد نقصانات کا تخمینہ لگا کر ازالہ کیا جائے گا۔

(جاری ہے)

مریم اورنگزیب نے بتایا کہ راوی، ستلج اور چناب میں سیلاب کی صورتِ حال ہے، چناب میں خانکی کے مقام پر اونچے درجے کا سیلاب ہے، قادرآباد میں بھی سیلاب کی صورتِ حال برقرار ہے اور رواس برج پر بھی اونچے درجے کا سیلاب ہے، تریموں برج سے 3 لاکھ 61 ہزار کیوسک کا ریلا گزر رہا ہے، راوی میں جسڑ کے مقام پر درمیانے درجے کا سیلاب ہے، بلوکی ہیڈورکس پر 2 لاکھ 82 ہزار کیوسک کا ریلا گزر رہا ہے جبکہ ستلج میں گنڈاسنگھ والا پر پانی کا بہا ئوانتہائی تیز ہے۔

صوبائی وزیر کا کہنا ہے کہ لوگوں کو محفوظ مقامات پر منتقل کرنے کا سلسلہ جاری ہے، متاثرہ علاقوں سے انخلاء کا عمل مکمل ہو چکا ہے، تحصیل اور ضلعی سطح پر ہنگامی بنیادوں پر ریلیف کا کام کیا جا رہا ہے، عوام سے درخواست ہے انتظامیہ کے ساتھ تعاون کریں، وزیراعلی نے نالوں کی صفائی، تجاوزات کے خلاف آپریشن شروع کیا، سیلاب سے 2 ہزار سے زائد موضع جات سیلاب سے متاثرہوئے، کمشنرز، ڈی سی، اے سی سمیت ہرسطح کے افسران فیلڈ میں موجود ہیں، سیلاب کے بعد نقصانات کا تخمینہ لگا کرعوام کا نقصان پوراکریں گے۔