آئین میں کہاں ہے کہ نائب وزیراعظم ایگزیکٹو کے اختیارات استعمال کرے گا؟ اسحاق ڈار کے 2 عہدوں پر عدالت کا سوال

کل ڈپٹی وزیراعظم کہہ دے کہ اسسٹنٹ وزیراعظم بھی ہوگا تو پھر کیا کریں گے؟ نائب وزیراعظم سے متعلق فرانس ایران ترکی میں تو ایسا ہوگا لیکن یہاں کیسے ہے؟ اسلام آباد ہائیکورٹ میں دورانَ سماعت جج کے ریمارکس

ساجد علی جمعرات 16 اکتوبر 2025 12:02

آئین میں کہاں ہے کہ نائب وزیراعظم ایگزیکٹو کے اختیارات استعمال کرے ..

اسلام آباد (اُردو پوائنٹ اخبارتازہ ترین۔ 16 اکتوبر2025ء) اسلام آباد ہائیکورٹ نے نائب وزیراعظم اور وزیر خارجہ اسحاق ڈار کے 2 عہدوں پر اہم سوالا پوچھ لیے۔ تفصیلات کے مطابق مسلم لیگ ن کے سینیٹر اسحاق ڈار کے نائب وزیراعظم اور وزیر خارجہ کے دو عہدے رکھنے کے خلاف کیس کی اسلام آباد ہائیکورٹ میں سماعت ہوئی جہاں اسحاق ڈار کے دو عہدے رکھنے کے خلاف رکن قومی اسمبلی شیر افضل مروت کی درخواست پر جسٹس خادم حسین سومرو یہ کیس سن رہے ہیں۔

آج کی سماعت کے دوران انہوں نے ریمارکس دیتے ہوئے اسحاق ڈار کے وکیل سے استفسار کیا کہ ’آئین میں کہاں ہے کہ نائب وزیر اعظم ایگزیکٹو کے اختیارات استعمال کرے گا؟ کل ڈپٹی وزیر اعظم کہہ دے کہ اسسٹنٹ وزیر اعظم بھی ہوگا تو پھر کیا کریں گے؟ یہ کیسے ہو سکتا ہے اس پر ہماری معاونت کریں‘۔

(جاری ہے)

جسٹس خادم حسین سومرو نے کہا کہ ’نائب وزیراعظم سے متعلق فرانس ایران ترکی میں تو ایسا ہوگا لیکن یہاں کیسے ہے وہ بتائیں، ہم نے آئین کو فالو کرنا یے، اس پر تیاری کریں اور آئیندہ سماعت پر دلائل دیں‘، بعد ازاں عدالت نے کیس کی سماعت ملتوی کردی اور آئندہ سماعت پر نائب وزیر اعظم کے آئین میں دیئے گئے اختیارات سے متعلق اسحاق ڈار کے وکیل عدیل واحد سے معاونت طلب کرلی۔

خیال رہے کہ اس سے پہلے یہ معاملہ سندھ ہائیکورٹ میں بھی زیر سماعت رہا جہاں چیف جسٹس سندھ ہائیکورٹ نے وزیرخارجہ اسحاق ڈار کی بطور ڈپٹی وزیر اعظم تقرری کے خلاف درخواست پر سماعت کی تھی، اس سلسلے میں سرکاری وکیل اور درخواست گزار عدالت میں پیش ہوئے، سماعت کے دوران سرکاری وکیل نے وفاقی حکومت کی جانب سے عدالت میں تحریری جواب جمع کرایا جہاں حکومتی جواب میں بتایا گیا تھا کہ ’اسحاق ڈار کو ڈپٹی وزیراعظم کا اعزازی عہدہ دیا گیا ہے وہ ڈپٹی وزیراعظم کے اختیارات استعمال نہیں کرتے‘۔