Live Updates

اسسٹنٹ کمشنر پتوکی کی ریسٹ ہائوس کے واش روم سے لاش برآمد

فرقان محمد خان مرگی کے دورے پڑنے کی میڈیسن بھی استعمال کرتے تھے ،فرانزک ٹیم نے شواہد اکٹھے کر لئے

اتوار 31 اگست 2025 17:05

پھولنگر(اُردو پوائنٹ اخبارتازہ ترین - این این آئی۔ 31 اگست2025ء)اسسٹنٹ کمشنر پتوکی فرقان محمد خان کی ریسٹ ہائوس سے لاش برآمد ہوئی ہے، اسسٹنٹ کمشنر واش روم میں مردہ حالت میں پائے گئے جن کے سر پر شدید چوٹ تھی ۔بتایا گیا ہے کہ اسسٹنٹ کمشنر پتوکی فرقان محمد خان گزشتہ کئی روز سے سیلاب متاثرین کے لیے کئے جانے والے انتظامات کی نگرانی کے لئے فیلڈ میں موجود اور بلوکی ریسٹ ہاوس میں رہائش پذیر تھے ۔

گزشتہ رات وہ ریسٹ ہائوس جا کر سو گئے اور صبح دیر تک نہ اٹھے تو ان کے گن میں کانسٹیبل اسد نے بیڈ روم میں دیکھا تو وہ موجود نہ تھے ،انہیں باہر بھی تلاش کیا گیا اور جب واش روم کودیکھا گیا تو اسسٹنٹ کمشنر فرقان احمد خان اوندھے منہ زمین پر گرے ہوئے تھے اور ان کے سر سے خون بہہ رہا تھا۔

(جاری ہے)

گن مین اسد نے فوری طور پر ریسکیو اور ڈی ایس پی پتوکی کو اطلاع دی اور ریسکیو کو طلب کیا گیا جہاں ان کی موت کی تصدیق ہوگئی ۔

تھانہ سرائے مغل پولیس نے فرانزک ٹیم کو طلب کر لیا اور موقع سے تمام شواہد اکٹھے کیے گئے ہیں ۔ بتایا گیاہے کہ اسسٹنٹ کمشنر فرقان محمد خان مرگی کے دورے پڑنے کی میڈیسن بھی استعمال کرتے تھے جو ان کے کمرے سے بھی ملی ہیں ۔فرقان محمد خان ایک ماہ قبل ہی پتوکی میں بطور اسسٹنٹ کمشنر تعینات ہوئے ہیں ،ابتدائی تفتیش کے مطابق واش روم میں گرنے سے سر پر شدید چوٹ آئی جس سے ان کی موت واقع ہوئی جبکہ مزید تحقیقات کی جا رہی ہیں اور فرانزک رپورٹ آنے کے بعد مزید حقائق سامنے آئیں گے۔میڈیا رپورٹس میں یہ اطلاعات بھی ہیں کہ اسسٹنٹ کمشنر کادماغ کی شریان پھٹنے سے انتقال ہوا۔