Live Updates

مریم نواز قصور کے اسکول میں قائم ریلیف کیمپ پہنچ گئیں، خواتین اور بچوں سے گفتگو ، مسائل دریافت کئے

اتوار 31 اگست 2025 21:30

قصور (اُردو پوائنٹ اخبارتازہ ترین - این این آئی۔ 31 اگست2025ء)وزیرِ اعلیٰ پنجاب مریم نواز قصور کے اسکول میں قائم ریلیف کیمپ پہنچ گئیں، جہاں انہوں نے خواتین اور بچوں سے بات چیت کی اور مسائل دریافت کیے۔وزیرِ اعلیٰ پنجاب نے قصور کے قریب سرحدی علاقے میں قائم ریلیف کیمپ کا دورہ کیا اور سیلاب زدہ علاقے گٹی کلنجر سے کشتی پر تلوار پوسٹ آنے والے متاثرہ خاندانوں کا خیر مقدم کیا۔

انہوں نے ریسکیو بوٹ سے آنے والی تمام خواتین کی خیریت دریافت کی اور متاثرین کو دلاسہ دیا، معصوم بچے کو گود میں اٹھا لیا اور ماں کے سپرد کیا۔بریفنگ میں بتایا گیا کہ سیلاب سے ضلع قصور کے 29 گائوں متاثر ہوئے اور 18 ہزار 300 سے زائد آبادی کا انخلاء ہوا جبکہ 36 ہزار 129 مویشی بحفاظت محفوظ مقامات پر منتقل کیے گئے۔

(جاری ہے)

متاثرہ نواحی گائوں سے 55 مویشیوں اور فارمر کے خاندان کو بیڑے پر تلوار پوسٹ منتقل کیا گیا۔

بریفنگ میں بتایا گیا کہ قصور ریلیف کیمپ میں دھوپ سڑی، مبوکے، اولہ کے اور دیگر علاقوں کے متاثرین شامل ہیں، ریلیف کیمپ میں 60 خاندان اور 312 افراد مقیم ہیں، جن کے کھانے کا انتظام ہے۔وزیرِ اعلیٰ پنجاب نے سیلابی ریلے میں گھرے نومولود بچے کو بحفاظت نکالنے پر ڈی ایس پی نعمان کو انعام دیا اور ریسکیو ٹیم کے لیے 10 لاکھ روپے انعام کا اعلان بھی کیا۔اس موقع پر ڈپٹی کمشنر قصور اور ڈی پی او نے تفصیلی بریفننگ دی، انہوں نے سیلاب سے بچائو کیلئے آبی ذخائر بنانے کا جائزہ لینے کا بھی حکم دیا۔