مانسہرہ میں انسداد پولیو مہم شروع

پیر 1 ستمبر 2025 11:24

ایبٹ آباد (اُردو پوائنٹ اخبارتازہ ترین - اے پی پی۔ 01 ستمبر2025ء) مانسہرہ میں انسدادِ پولیو مہم شروع ہو گئی ہے۔ضلع بھر میں پولیو ٹیموں کی سکیورٹی کے فول پروف انتظامات کئے گئے ہیں تاکہ مہم کو کامیاب بنایا جا سکے۔ مانسہرہ پولیس کے مطابق پیر کو تمام پولیو ٹیموں کو سخت سکیورٹی حصار میں فیلڈ میں روانہ کیا گیا، جبکہ صبح سویرے ڈیوٹی پر تعینات پولیس افسران و جوانوں کو ضروری ہدایات بھی دی گئیں۔

(جاری ہے)

اس موقع پر افسران نے واضح کیا کہ بچوں کو پولیو کے قطرے پلوانا قومی ذمہ داری ہے اور پولیس فورس اس سلسلے میں ہر ممکن تعاون فراہم کرے گی۔ڈی پی او مانسہرہ نے تمام ایس پیز اور ڈی ایس پیز کو ہدایت کی کہ وہ خود فیلڈ میں موجود رہیں اور پولیو ٹیموں کی سکیورٹی کی براہِ راست نگرانی کریں، تاکہ کسی بھی ناخوشگوار واقعے سے بچا جا سکے۔ ضلع میں امن و امان کے قیام کے لئے تمام داخلی و خارجی راستوں پر ناکہ بندیاں قائم اور گشت کے نظام کو مزید موثر بنایا گیا ہے۔ ڈی پی او مانسہرہ شفیع اللہ گنڈا پور نے اس عزم کا اظہار کیا کہ انسدادِ پولیو مہم کو ہر صورت کامیاب بنایا جائے گا اور اس نیک مقصد کے حصول کے لیے پولیس ہمہ وقت پولیو ٹیموں کے ساتھ کھڑی ہے۔

Facebook Twitter Google + Share on Whatsapp

مانسہرہ میں انسداد پولیو مہم شروع

متعلقہ عنوان :

مزید قومی خبریں