پارلیمانی کشمیر کمیٹی کے چیئرمین رانا قاسم نون کا سید علی گیلانی کو خراج عقیدت

پیر 1 ستمبر 2025 18:11

اسلام آباد (اُردو پوائنٹ اخبارتازہ ترین - این این آئی۔ 01 ستمبر2025ء)پارلیمانی کشمیر کمیٹی کے چیئرمین رانا قاسم نون نے کشمیری حریت پسند رہنما سید علی گیلانی کی تحریک آزادی کشمیر کے لئے قربانیوں کو خراج عقیدت پیش کرتے ہوئے کہا ہے کہ ہم ان کے راستے پر چلیں گے اور ان کی تحریک کو جاری رکھیں گے۔

(جاری ہے)

پیر کو پاکستان مونومنٹ لوک ورثہ میں سید علی گیلانی کے نام سے منسوب کارنر کے دورے کے موقع پر میڈیا سے گفتگو کرتے ہوئے انہوں نے کہا کہ تحریک آزاد کشمیر میں سید علی گیلانی کا ایک کلیدی کردار ہے،دنیا میں آزادی کی تحریکیں کئی سالوں پر محیط ہوتی ہیں۔

رانا قاسم نون نے کہا کہ سید علی گیلانی کے قیدو بند کی صعوبتیں برداشت کرنے پر خراج عقیدت پیش کرتے ہیں،کشمیر کی آزاد ی کے حوالے سے انہوں نے جو جدوجہد کی اس کو بھی خراج عقیدت پیش کرتے ہیں۔انہوں نے کہا کہ ہم ان کے راستے پر چلیں گے اور ان کی تحریک کو جاری رکھیں گے۔اس موقع پر انہوں نے ’’ہم پاکستانی ہیں۔پاکستان ہمارا ہے‘‘ کا نعرہ بھی لگایا گیا۔