Live Updates

چاچڑاں کے مقام پر بے نظیر پل کو سیلاب سے کوئی خطرہ نہیں،اے ڈی سی جی رحیم یارخان

منگل 2 ستمبر 2025 18:09

رحیم یارخان (اُردو پوائنٹ اخبارتازہ ترین - اے پی پی۔ 02 ستمبر2025ء) دریائے سندھ میں چاچڑاں شریف سے 3 لاکھ 31 ہزار کیوسک کا ریلہ گزر رہا ہے، 5 ستمبر تک 9 سے 11 لاکھ کیوسک کا سیلابی ریلا چاچڑاں کے مقام پر پہنچے گا۔ اے ڈی سی جی نے کہا کہ پاک فوج، انتظامیہ پولیس، ریسکیو سمیت تمام ادارے الرٹ ہیں، ضلع بھر میں فلڈ ایمرجنسی نافذ کرکے تمام اداروں کی چھٹیاں منسوخ کر دی گئیں ہیں، تمام ہسپتالوں میں ایمرجنسی نافذ ہے، سیلابی ریلا آنے سے قبل لوگوں کے انخلاء کیلئے انتظامات مکمل کر لئے گئے، 26725 لوگوں کو بحفاظت ریسکیو کرکے محفوظ مقام پر منتقل کر دیا گیا ہے، 37970 کے قریب مال مویشیوں کو محفوظ کر لیا گیاہے۔

عرفان انور نے بتایا کہ روزانہ کی بنیاد پر اعلانات کئے جارہے ہیں تاکہ لوگ محفوظ مقام پر پہنچ جائیں، 10 بوٹنگ کیمپس، ریسکیو کی 18 اور پرائویٹ 20 اور پولیس کے پاس 10 کشتیاں، موجود ہیں، چاروں تحصیلوں میں 12 ریسکیو اینڈ ریلیف کیمپس قائم کردئیے ہیں، تمام کیمپس میں صحت، لائیو اسٹاک، سپرے، اور تمام ادویات اور خوراک موجود ہے، کچھ روز قبل 5 لاکھ کیوسک سے زائد پانی کا سیلابی ریلا گزرا جسکے باعث 29 دیہات زیرآب آئے۔

(جاری ہے)

اے ڈی سی جی نے کہا کہ متاثرہ علاقوں میں ریسکیو اینڈ ریلیف آپریشن کے ذریعے لوگوں کو محفوظ کر لیا کوئی جانی نقصان نہیں ہوا، سیلابی صورتحال کے پیش نظر حفاظتی منچن بند کو مکمل طور مانیٹر کیا جارہا ہے، بے نظیر شہید پل کو سیلابی صورتحال سے خطرہ نہیں ہے، پل کے نچلے حصے میں سیلابی پانی کے بہاؤ میں روانی کیلئے اقدامات کیے جارہے ہیں۔\378