جونیئر ورلڈ کپ کیلئے بھی ہاکی ٹیم بھارت نہ بھیجنے کا عندیہ

دسمبر میں بھارت میں ہی جونیئر ورلڈکپ ہو رہا ہے، اس میں بھی پاکستانی ٹیم کی شرکت مشکل ہے،صدر پی ایچ ایف

منگل 2 ستمبر 2025 21:20

لاہور(اُردو پوائنٹ اخبارتازہ ترین - این این آئی۔ 02 ستمبر2025ء)پاکستان ہاکی فیڈریشن کے صدر طارق بگٹی نے ایشیا کپ کے بعد جونیئر ورلڈکپ کیلئے بھارت نہ جانیکا عندیہ دے دیا۔لاہورمیں میڈیا سے بات چیت میں انہوں نے واضح کیا کہ دونوں ملکوں کے درمیان جاری کشیدگی کی وجہ سے ایشیا کپ میں ٹیم کونہیں بھیجا۔ دسمبر میں بھارت میں ہی جونیئر ورلڈکپ ہورہاہے،اس میں بھی پاکستانی ٹیم کی شرکت مشکل ہے۔

ایشیا کپ میں عدم شرکت سے ورلڈکپ کوالیفائرکا موقع کھونے کے سوال پر طارق بگٹی کا موقف تھا کہ انٹرنیشنل ہاکی فیڈریشن کوتمام حالات کا علم ہے کہ پاکستان ٹیم کس وجہ سے ایشیا کپ کھیلنے نہیں گئی،اس لیے امید ہے کہ ایف آئی ایچ ہمیں ورلڈ کپ کوالیفائر کیلئے کوئی اور موقع دے گی۔انہوں نے کہا کہ پرو لیگ کیلئے موقع ملنا پاکستان ہاکی کے لیے اچھا شگون ہے، ہمیں اپنی ٹیم کی کارکردگی میں بہتری لانے کے لیے غیرملکی گول کیپنگ کی ضرورت ہوگی، گول کیپنگ کے شعبے کو مضبوط بنانا بہت اہم ہے، اس کے بغیر گزارہ نہیں ہوگا،قومی ہاکی ٹیم کے لیے غیر ملکی گول کیپنگ کوچ رکھنا چاہتے ہیں اس معاملے پر بھی حکومت کا تعاون درکار ہے۔

(جاری ہے)

غیرملکی کوچ بہت زیادہ معاوضہ مانگتے ہیں،ہمارے پاس اتنے وسائل نہیں کہ فیڈریشن اپنے طورپر ان کو تنخواہ دے سکے، جب حکومت غیر ملکی کوچز کیلئے حامی بھرے گی تو پھر کسی سے بات کریں گے۔انہوںنے کہاکہ پرولیگ کے لیے فنڈز دینے کے لیے وزیر اعظم ،آئی پی سی اور پی ایس بی کے شکر گزار ہیں،ہمارا موقف ہے کہ پرو ہاکی لیگ کے فنڈز پاکستان اسپورٹس بورڈ کے پاس ہی رہیں اور وہ ہی تمام اخراجات کرے تاکہ اس معاملے میں شفافیت کو یقینی بنایا جاسکے۔