متحدہ عرب امارات نے امدادی سامان اور سرچ اینڈ ریسکیو ٹیم افغانستان بھیج دی

بدھ 3 ستمبر 2025 10:20

ابوظہبی (اُردو پوائنٹ اخبارتازہ ترین - اے پی پی۔ 03 ستمبر2025ء) متحدہ عرب امارات نے افغانستان میں زلزلہ متاثرین کی مدد اور امدادی کارروائیوں کے لیے سرچ اینڈ ریسکیو ٹیم بھیج دی ہے۔اردو نیوز کے مطابق متحدہ عر ب امارات کے صدر شیخ محمد بن زاید آل نہیان کی ہدایت پر ابوظہبی سول ڈیفنس اتھارٹی، نیشنل گارڈ اور جوائنٹ آپریشنز کمانڈ پر مشتمل خصوصی ٹیم سرچ اینڈ ریسکیوکے کاموں کے علاوہ متاثرین کی مدد کرے گی۔

(جاری ہے)

متحدہ عرب امارات نے ضروری امدادی سامان بھی روانہ کیا ہے، جس میں خوراک، دواوں اور خیمے شامل ہیں تاکہ متاثرہ خاندانوں اور زخمیوں کی مدد کی جا سکے۔یہ اقدام امارات کے اس انسانی مشن کا حصہ ہے جو دنیا بھر میں قدرتی آفات اور سانحات کے موقع پر فوری امداد کی فراہمی کے عزم کو ظاہر کرتا ہے۔یاد رہے کہ افغانستان میں اتوار اور پیر کی درمیانی شب 6 شدت کا زلزلہ آیا جس سے اب تک 1400افراد جاں بحق اور 3ہزار سے زائد زخمی ہو گئے۔