سعودی عرب میں قومی دن پر سیل ، پرمٹ کے لیے درخواستیں طلب

کوئی بھی ادارہ اپنی مصنوعات یا اشیا پر رعایتی سیل کا اعلان پرمٹ کے بغیر نہیں کرسکے گا،وزارت تجارت

بدھ 3 ستمبر 2025 14:40

ریاض(اُردو پوائنٹ اخبارتازہ ترین - این این آئی۔ 03 ستمبر2025ء)سعودی وزارتِ تجارت نے قومی دن پر رعایتی سیل لگانے والے اداروں سے پرمٹ کے لیے درخواستیں طلب کر لیں۔ سعودی وزارتِ تجارت نے 95 ویں قومی دن پر رعایتی سیل لگانے والے تجارتی اداروں اور آن لائن سٹورز کی انتظامیہ کو سیل پرمٹ کے لیے ویب سائٹ پر درخواست جمع کرانے کی ہدایت کی ہے۔تجارتی قانون کے مطابق کوئی بھی ادارہ اپنی مصنوعات یا اشیا پر رعایتی سیل کا اعلان پرمٹ کے بغیر نہیں کرسکے گا۔

(جاری ہے)

تجارتی سیل لگانے کیلیے ضروری ہے کہ وزارت کی متعلقہ کمیٹی کو اصل نرخ اور سیل کے بعد کے نرخوں کے بارے میں تفصیلات سے مطلع کرے جس کے بعد وزارت کی جانب سے پرمٹ جاری کیا جاتا ہے۔رعایتی سیل کا اشتہار پرمٹ کے بغیر لگانا غیر قانونی ہے جس پر جرمانہ مقرر ہے۔وزارت کی ٹیمیں مختلف اوقات میں مارکیٹوں کا دورہ کرتی ہیں تاکہ خلاف ورزی کی روک تھام کی جائے اور محض سیل کا بینر یا بورڈ لگا کر عوام کو دھوکا دینے والوں کے خلاف کارروائی کی جاسکے۔وزارت کا کہنا تھا قومی دن کی مناسبت سے سیل کا دورانیہ 16 سے 30 ستمبرتک ہوگا۔ وہ ادارے جو اپنی اشیا پر سیل لگانے چاہتے ہیں انہیں چاہیے کہ وہ وقت سے پہلے پرمٹ حاصل کرلیں۔