ہاکی کا کھلاڑی 400 روپے ڈیلی الائونس پر نہیں کھیلے گا،رانا مجاہد

ہاکی فیڈریشن اور پاکستان اسپورٹس بورڈ بیٹھ کر مالی معاملات کو دیکھیں گے، گفتگو

بدھ 3 ستمبر 2025 19:10

اسلام آباد (اُردو پوائنٹ اخبارتازہ ترین - این این آئی۔ 03 ستمبر2025ء)ہاکی فیڈریشن کے سیکریٹری جنرل رانا مجاہد نے کہا ہے کہ ہاکی کا کھلاڑی 400 روپے ڈیلی الائونس پر نہیں کھیلے گا۔نجی ٹی وی کے مطابق رانا مجاہد نے کہا کہ اسپورٹس بورڈ کہتا ہے ہاکی کے کھلاڑی کو 400 روپے کا ڈیلی الائونس دو، اس پر پلیئر کیسے کھیلے گا انہوں نے کہا کہ ہاکی فیڈریشن 100 ڈالرز کے قریب کھلاڑی کو الائونس دیتی ہے جس پر پلیئر مطمئن نہیں، فیڈریشن کے پاس تو اپنا اسٹیڈیم تک نہیں۔

سیکریٹری جنرل نے کہا کہ ہاکی فیڈریشن کا بیرونِ ملک دورے پر بِل ادا نہ کرنا غلط ہے، ایک بار بِل ادا نہ کرنے کا مسئلہ ہوا تھا لیکن روٹین میں ایسا نہیں ہوتا۔انہوںنے کہاکہ اسپورٹس بورڈ سمجھتی ہے کہ ہاکی فیڈریشن کے مالی معاملات ٹھیک نہیں جبکہ فیڈریشن مالی معاملات کو اپنے قانون کے مطابق دیکھتی ہے۔

(جاری ہے)

رانا مجاہد نے کہا کہ ہاکی فیڈریشن اور پاکستان اسپورٹس بورڈ بیٹھ کر مالی معاملات کو دیکھیں گے، فیڈریشن کے پاس صرف قومی ٹیم ہے، جسے دوروں پر بھیجا جاتا ہے۔

انہوں نے کہا کہ ہاکی فیڈریشن اپنی حیثیت سے بڑھ کر کام کر رہی ہے، پرائیویٹ اسپانسر شپ کے ساتھ حکومت پیسے دے گی تو ہاکی فیڈریشن چلے گی۔سیکرٹری جنرل نے کہا کہ کھلاڑیوں کو منتیں کر کے واپس لائے ہیں، ڈپارٹمنٹس ختم ہو رہے تو کیسے کھلاڑی اپنا گزر بسر کریں گے۔اٴْنہوںنے کہاکہ پرو لیگ میں قومی ہاکی ٹیم بھرپور تیاری کے ساتھ جائے گی، پرو لیگ میں ٹاپ ٹین ٹیمیں ہوں گی، پاکستان کا چیمپئن ہونا مشکل ہے لیکن اچھے رزلٹس لیں گے۔