Live Updates

بھارتی جنگی جنون، اپنی ہی ٹیم پر پابندیاں لگادیں

دبئی میں پریکٹس کے دوران پاکستانی نیٹ بولرز کے ساتھ رابطے اور تصاویر لینے سے بھی ہچکچا رہے ہیں بلکہ مکمل طور پر گریز کر رہے،رپورٹ

بدھ 17 ستمبر 2025 12:36

بھارتی جنگی جنون، اپنی ہی ٹیم پر پابندیاں لگادیں

دبئی (اُردو پوائنٹ اخبارتازہ ترین - این این آئی۔ 17 ستمبر2025ء)ایشیا کپ میں شریک بھارتی کرکٹرز دبئی میں پریکٹس کے دوران پاکستانی نیٹ بولرز کے ساتھ رابطے اور تصاویر لینے سے بھی ہچکچا رہے ہیں بلکہ مکمل طور پر گریز کر رہے ہیں۔ایک رپورٹ کے مطابق یہ رویہ اس وقت سامنے آیا جب چند روز قبل بھارتی کپتان سوریا کمار یادیو کی ایشین کرکٹ کونسل اور پی سی بی کے چیئرمین محسن نقوی کے ساتھ ہاتھ ملانے کی تصویر وائرل ہوئی، جس پر بھارتی میڈیا اور سوشل میڈیا نے شدید ردعمل دیا۔

دبئی کی آئی سی سی اکیڈمی میں بھارتی ٹیم پریکٹس کے لیے پہنچتی ہے تو یو اے ای میں مخلتف کلبس سے کھیلنے والے کھلاڑی بولنگ کرانے آتے ہیں، جن پر بھارتی ٹیم انتظامیہ نے پابندی لگا دی ہے کہ اپنے اسمارٹ فونز سے پلیئرز کی تصویر نہ لی جائے۔

(جاری ہے)

دبئی میں بھارتی ٹیم انتظامیہ نے نہ صرف نیٹ بولرز پر اسمارٹ فونز استعمال کرنے پر پابندی لگائی ہے بلکہ پریکٹس کرانے والے پلئیرز کے اسمارٹ فونز بھی بھارٹی ٹیم انتظامیہ اپنے قبضے میں لے لیتی ہے اور جب ٹیم پریکٹس ختم کرتی ہے، تو سامان پیک کرنے کے بعد نیٹ بولرز کو اسمارٹ فون واپس کیے جاتے ہیں۔

ذرائع کے مطابق بھارتی کرکٹ بورڈ نے کھلاڑیوں کو ہدایت دی ہے کہ وہ پاکستانی نیٹ بولرز کے ساتھ کسی قسم کی تصاویر یا دوستانہ گفتگو سے اجتناب کریں۔آئی سی سی اکیڈمی کے ذرائع کے مطابق نیٹ سیشن میں مختلف ممالک کے بولرز شامل ہوتے ہیں، جن میں پاکستان، افغانستان، بنگلہ دیش، سری لنکا اور بھارت کے کھلاڑی شامل ہیں اور ماضی میں تصاویر کھینچنا معمول کی بات رہی ہے۔

گزشتہ چیمپیئنز ٹرافی دبئی لیگ میں پاکستانی نیٹ بولرز نے ویرات کوہلی اور دیگر بھارتی کھلاڑیوں کے ساتھ تصاویر بھی لی تھیں، مگر اب بھارتی بورڈ کے دباؤ کے تحت کھلاڑیوں کا رویہ بدل گیا ہے۔کرکٹ مبصرین کا کہنا ہے کہ سیاسی دباؤ اور ’جنگی جنون‘ بھارتی کھلاڑیوں کی آزادانہ پریکٹس اور دوستانہ میل جول کو محدود کر رہا ہے۔