یوٹیلیٹی اسٹورز کے تمام اثاثے ،جائیدادیں رواں مالی سال میں فروخت کرنے کا فیصلہ

جمعرات 4 ستمبر 2025 10:30

لاہور(اُردو پوائنٹ اخبارتازہ ترین - این این آئی۔ 04 ستمبر2025ء)حکومت نے یوٹیلیٹی اسٹورز کارپوریشن کے تمام اثاثے بشمول جائیدادیں رواں مالی سال کے دوران فروخت کرنے کا فیصلہ کر لیا ۔جبکہ وزارت صنعت و پیداوار کے پاس موجود 15 ارب روپے کے بجٹ کو ٹی سی پی کے چینی سبسڈی واجبات کی کلیئرنس کے لیے استعمال کیا جائے گا۔ میڈیا رپورٹ کے مطابق اسٹیٹ بینک کے منظور شدہ سروے کے مطابق کارپوریشن کے اثاثوں کی مالیت 10.5 ارب سے 12.6 ارب روپے کے درمیان ہے، تاہم کچھ جائیدادوں پر قانونی پیچیدگیاں اور کمرشلائزیشن چارجز بھی موجود ہیں جنہیں حل کرنے کے لیے اضافی اخراجات درکار ہوں گے۔

بتایا گیا ہے کہ نومبر تک 832 ملازمین گوداموں اور ریجنل آفسز کے معاملات نمٹانے اور قانونی مقدمات دیکھنے کے لیے رکھے جائیں گے جس پر 210 ملین روپے ماہانہ خرچ ہوں گے جبکہ دسمبر 2025 سے جون 2026 تک مزید کم کر کے 326 عملہ رکھا جائے گا جس پر 115 ملین روپے ماہانہ خرچ ہوگا۔

(جاری ہے)

ای سی سی سے درخواست کی گئی ہے کہ وہ وزارت صنعت و پیداوار کو 30.216 ارب روپے کا اضافی بجٹ فراہم کرے تاکہ ملازمین کو تنخواہیں، واجبات، سیورنس پیکج، کنٹریکٹ عملے کے معاوضے، گوداموں کے اخراجات اور وینڈرز کی ادائیگی ممکن بنائی جا سکے۔ باقی تقریباً 9.9 ارب روپے اگلے مالی سال 2026-27کے بجٹمیں رکھے جائیں گے۔