یہ ہماری خوش قسمتی ہے کہ اللہ تعالیٰ نے ہمیں رسولﷺ کا امتی بنایا جو رحمتہ العالمین ہیں،عامر عبدالغفار لون

جمعرات 4 ستمبر 2025 14:16

مظفرآباد (اُردو پوائنٹ اخبارتازہ ترین - این این آئی۔ 04 ستمبر2025ء)آزاد حکومت ریاست جموں وکشمیر کے وزیر ماحولیات عامر عبدالغفار لون نے جشن عید میلاد النبی صلی اللہ علیہ وآلہ وسلم کی مناسبت سے جاری کردہ قوم کے نام اپنے پیغام میں کہا کہ پاکستان اس وقت جن مشکلات اور نازک صورتحال سے دو چار ہے ان میں ہمیں نبی کریمﷺ کی تعلیمات کی طرف رجوع کرنے کی اشد ضرورت ہے میں نبی اکرم حضرت محمدﷺ کی ولادت با سعادت کے موقع پر پوری پاکستانی وکشمیری قوم اور امت مسلمہ کو دل کی اتھاہ گہرائیوں سے مبارکباد پیش کرتا ہوں۔

انہوں نے کہا کہ یہ ہماری خوش قسمتی ہے کہ اللہ تعالیٰ نے ہمیں اس رسولﷺ کا امتی بنایا کہ جو رحمتہ العالمین ہیں، آپ ﷺ کی ہمہ گیر اور جامع الصفات شخصیت ہر انسان کے لئے قابلِ تقلید ہے۔

(جاری ہے)

انھوں نے کہا کہ نبی اکرم ﷺ کی زندگی ہمدردی، رواداری اورمحبت کی ایک تابندہ مثال ہے۔ آپﷺ کا کردار اور اعمال ہمارے لیے بہترین نمونہ ہیں جس میں ہمیں احسان، انصاف اور صلہ رحمی کا درس ملتا ہے جو کہ آج کی منقسم دنیا میں امید کی شمع کی مانند ہے۔

انہوں نے کہا کہ بحیثیت قوم ہم بھائی چارے، محبت اور ہمدردی کی ان اقدار پر عمل پیرا ہوں جو رسول ﷺ نے وضع فرمائی ہیں اور ہم تمام مسلمانوں اور مختلف عقائد کے لوگوں کے درمیان اتحاد اور بھائی چارے کے لیے ان کے پیغام کو مشعل راہ بنائیں،ہم رواداری اور بقائے باہمی کا نمونہ بننے کی بھرپور کوشش کرنے کی ضرورت ہے۔ان کا کہنا تھا آج کا با برکت دن اس عہد کی تجدید کا بھی دن ہے کہ ہم ان اقدار، جن کی بنیاد آپﷺ نے ڈالی، اپنی انفرادی اور اجتماعی زندگی میں اختیار کریں گے۔