نائیجیریا میں کشتی الٹنے سے 60 افراد جاں بحق ‘ درجنوں کو بچا لیا گیا

متاثرہ کشتی میں 100 سے زائد مسافر سوار تھے‘حادثہ کشتی کے پانی میں ڈوبے درخت کے ساتھ ٹکرانے سے پیش آیا. نائیجیرین حکام

میاں محمد ندیم جمعرات 4 ستمبر 2025 13:48

نائیجیریا میں کشتی الٹنے سے 60 افراد جاں بحق ‘ درجنوں کو بچا لیا گیا

ابوجا(اردوپوائنٹ اخبارتازہ ترین-انٹرنیشنل پریس ایجنسی۔04 ستمبر ۔2025 )نائیجیریا میں کشتی الٹنے سے 60 افراد جاں بحق ہو گئے جبکہ درجنوں کو بچا لیا گیا، مقامی حکام کے مطابق حادثہ ریاست نائیجیریا کے شمالی وسطی حصے میں پیش آیا، متاثرہ کشتی میں 100 سے زائد مسافر سوار تھے.

(جاری ہے)

برطانوی نشریاتی ادارے کے مطابق کشتی نائیجیریاکے علاقے مالالے کے گاﺅں تونگان س±ولے سے روانہ ہوئی تھی اور تقریب میں شرکت کے لیے دوسرے گاﺅں جا رہی تھی لیکن گاوساوا کمیونٹی کے قریب پانی میں ڈوبے ہوئے ایک درخت سے ٹکرا گئی بورگو لوکل گورنمنٹ ایریا کے چیئرمین عبداللہ بابا آرا نے بتایا کہ ہلاکتوں کی تعداد بڑھتی جا رہی ہے، ان کے مطابق اب تک 60 افراد کی موت کی تصدیق ہو چکی ہے جبکہ کئی افراد لاپتہ ہیں اور 10 زخمیوں کی حالت تشویشناک ہے.

شگومی کے ضلعی سربراہ سعدو انووا محمد نے بتایا کہ حادثہ مقامی وقت کے مطابق صبح 11 بجے پیش آیا، وہ دوپہر 12 بجے سے شام 4 بجے تک جائے وقوعہ پر موجود رہے اور اس دوران 31 لاشیں نکالی گئیں، ان کے مطابق 4 لاشوں کی تدفین اسلامی رسومات کر دی گئی ہیں، جاں بحق افراد میں خواتین اور بچے بھی بڑی تعداد میں شامل ہیں. نائیجر اسٹیٹ ایمرجنسی مینجمنٹ ایجنسی نے کہا کہ امدادی عملہ اور مقامی غوطہ خور لاپتہ افراد کی تلاش کر رہے ہیں، ایجنسی کے مطابق اب تک 29 ہلاکتوں اور 50 افراد کو زندہ بچانے کی تصدیق ہو چکی ہے، جبکہ 2 افراد لاپتہ ہیں حکام نے کہا کہ کشتی حد سے زیادہ مسافروں سے بھری ہوئی تھی اور درخت سے ٹکرا کر الٹ گئی، نائیجیریا میں بالخصوص برسات کے موسم میں کشتیوں کے حادثات عام ہیں، جہاں حفاظت کے ضوابط پر عمل درآمد کمزور ہے، کشتیاں زیادہ بوجھ لاد کر چلائی جاتی ہیں اور اکثر پرانی و خستہ کشتیوں کا استعمال کیا جاتا ہے.