سان فرانسسکو ،پرائیویسی کی خلاف ورزی پر گوگل کو 425 ملین ڈالر جرمانہ

جمعرات 4 ستمبر 2025 16:54

سان فرانسسکو (اُردو پوائنٹ اخبارتازہ ترین - این این آئی۔ 04 ستمبر2025ء)سان فرانسسکو کی فیڈرل عدالت نے ٹیکنالوجی کمپنی گوگل (الفابیٹ) کو صارفین کی پرائیویسی کی خلاف ورزی پر 425 ملین ڈالرہرجانہ ادا کرنے کا حکم دے دیا۔یہ فیصلہ اس مقدمے کے بعد سنایا گیا جس میں الزام لگایا گیا تھا کہ گوگل نے گزشتہ آٹھ سالوں تک لاکھوں صارفین کے موبائل ڈیوائسز سے ڈیٹا اکٹھا کیا۔

(جاری ہے)

مقدمے میں صارفین نے دعوی کیا تھا کہ گوگل نے ان کے اعتماد کو توڑا اور ڈیٹا استعمال کر کے بھاری منافع کمایا، اسی لیے 31 ارب ڈالر کے ہرجانے کا مطالبہ کیا گیا تھا، تاہم جیوری نے گوگل کو صرف 425 ملین ڈالر ادا کرنے کا ذمہ دار ٹھہرایا۔جیوری نے فیصلہ دیا کہ گوگل پرائیویسی کی خلاف ورزی کے دو الزامات میں قصوروار پایا گیا ہے، مگر یہ ثابت نہیں ہو سکا کہ کمپنی نے بدنیتی کے ساتھ ایسا کیا، اس لیے اس پر کوئی اضافی سزا یا پنیشمنٹ عائد نہیں کی گئی۔