ورسٹائل اداکار مسعود اختر کا یوم پیدائش جمعہ کو منایا گیا

جمعہ 5 ستمبر 2025 12:33

اسلام آباد (اُردو پوائنٹ اخبارتازہ ترین - اے پی پی۔ 05 ستمبر2025ء) پاکستان ٹیلی ویژن، سٹیج، تھیٹر ،فلم کے ورسٹائل اورمعروف اداکار مسعود اختر کا یوم پیدائش 5 ستمبر جمعہ کو منایا گیا۔مسعود اختر 5 ستمبر 1939 کو ساہیوال میں پیدا ہوئے۔ ابتدائی تعلیم مقامی سکول سے حاصل کرنے کے بعد انھوں نے مری کالج میں داخلہ لیا۔ بعد ازاں لاہور منتقل ہو کر بینک ملازمت کے ساتھ ایل ایل بی کیا۔

دوران ملازمت انہوں نے ریڈیو پاکستان پر کام کا آغاز کیا اور برجستہ جملوں کی ادائیگی سے تھیٹر پر اداکاری کی دنیا میں قدم رکھا۔ 1960 کی دہائی میں فن کارانہ زندگی کا آغاز کیا اور جلد ہی سٹیج کے مشہور اداکاروں میں شمار ہونے لگے۔ ان کے فن کو نکھارنے میں نذیر ضیغم نے نمایاں کردار ادا کیا۔انہوں نے ٹیلی وژن کے متعدد ڈراموں میں بھی کام کیا اور 1968 میں فلمی دنیا میں قدم رکھا۔

(جاری ہے)

انھوں نے پہلی فلم سنگدل میں کام کیا جو بہت مقبول ہوئی انہوں نے درد، دوسری ماں، آنسو، تیری صورت میری آنکھیں، جاپانی گڈی، گھرانہ، میرا نام محبت، بھروسا، انتخاب، نکی جئی ہاں سمیت کئی فلموں میں شاندار اداکاری کے جوہر دکھائے۔مسعود اختر نے کئی فلموں میں ولن کی حیثیت سے بھی کام کیا۔ حکومت پاکستان کی جانب سے مسعود اختر کو تمغہ حسن کارکردگی سے بھی نوازا گیا۔ مسعود اختر 5 مارچ 2022 کو 82 سال کی عمر میں لاہور میں وفات پا گئے۔ ان کی سالگرہ کے موقع پر علمی، ادبی حلقوں اور شو بز انڈسٹری کے زیر اہتمام مختلف تقریبات کا انعقاد کیا گیا اور مسعود اختر کی خدمات پر خراج تحسین پیش کیا گیا۔