Live Updates

علیمہ خان پرمیڈیا سے گفتگو کے دوران انڈہ پھینک دیا گیا

پولیس نے انڈہ پھینکنے والی دونوں خواتین کو موقع پر ہی حراست میں لے لیا

فیضان ہاشمی جمعہ 5 ستمبر 2025 14:36

علیمہ خان پرمیڈیا سے گفتگو کے دوران انڈہ پھینک دیا گیا

راولپنڈی(اُردو پوائنٹ اخبارتازہ ترین۔ 05 ستمبر2025ء) بانی پی ٹی آئی عمران خان کی بہن علیمہ خانم کو دو خواتین نے انڈہ مار دیا۔ میڈیا رپورٹس کے مطابق یہ ناخوشگوار واقعہ اس وقت پیش آیا جب علیمہ خان میڈیا سے گفتگو کر رہی تھیں۔ اس دوران اچانک دو خواتین آگے بڑھیں اور ان پر انڈہ پھینک دیا۔ علیمہ خان نے تحمل کا مظاہرہ کرتے ہوئے اپنی گفتگو مختصر کر دی۔

واقعے کی اطلاع ملتے ہی پولیس نے دونوں خواتین کو موقع پر ہی حراست میں لے لیا۔ ترجمان راولپنڈی پولیس انسپکٹر سجاد الحسن کے مطابق انڈہ پھینکنے والی خواتین کا تعلق پی ٹی آئی سے ہے۔ بتایا گیا کہ خیبرپختونخوا سے آل گورنمنٹ ایمپلائز گرینڈ الائنس اور آل پاکستان کلرک ایسوسی ایشن کے کارکن اپنے مطالبات کے سلسلے میں احتجاج کے لیے راولپنڈی آئے تھے۔

(جاری ہے)

پولیس کا کہنا ہے کہ خواتین نے علیمہ خان سے سوالات کیے لیکن جواب نہ ملنے پر مشتعل ہو کر انڈہ پھینک دیا۔ واقعے کے بعد دونوں خواتین کو حراست میں لے کر اڈیالہ چوکی منتقل کر دیا گیا، جہاں ان سے تفتیش جاری ہے۔ پی ٹی آئی رہنماؤں نے واقعے پر شدید ردعمل دیتے ہوئے مطالبہ کیا ہے کہ ملوث خواتین کے خلاف فوری مقدمہ درج کیا جائے۔ پولیس حکام کا کہنا ہے کہ معاملے کی تحقیقات مکمل ہونے کے بعد قانونی کارروائی عمل میں لائی جائے گی۔

عمران خان کی بہن علیمہ خانم کو دو خواتین نے میڈیا سے گفتگو کے دوران انڈہ مار دیا۔ پولیس نے دونوں خواتین کو حراست میں لے لیا۔ pic.twitter.com/p2Dsj2M7Ev
— Zulqarnain Haider (@zulqarnainARY) September 5, 2025