پاک امریکابراہ راست پروازیں دوبارہ شروع کرنے کے حوالے سے اہم پیش رفت،

یو ایس فیڈرل ایوی ایشن ایڈمنسٹریشن کی ایک ٹیم آج پاکستان پہنچے گی ،سی اے اے نے آڈٹ کی تیاری مکمل کرلی

جمعہ 5 ستمبر 2025 17:10

کراچی(اُردو پوائنٹ اخبارتازہ ترین - این این آئی۔ 05 ستمبر2025ء)پاکستان سے امریکا کے لیے براہ راست پروازیں دوبارہ شروع کرنے کے حوالے سے ایک اہم پیش رفت ہوئی ہے، یو ایس فیڈرل ایوی ایشن ایڈمنسٹریشن کی ایک ٹیم آج(ہفتہ) پاکستان پہنچے گی ۔تفصیلات کے مطابق امریکا کے لیے پاکستان سے براہ راست پروازوں کے حوالے سے اہم پیش رفت ہوئی ہے، کئی سال بعد پہلی بار امریکی فیڈرل ایوی ایشن اتھارٹی ٹیم آج(ہفتہ)6 ستمبر کو پاکستان پہنچے گی، پاکستان سول ایوی ایشن اتھارٹی نے امریکی فیڈرل ایوی ایشن اتھارٹی کی ٹیم کی آمد سے قبل آڈٹ کی تیاری مکمل کرلی ۔

ذرائع نے بتایاکہ امریکی فیڈرل ایوی ایشن اتھارٹی ٹیم پاکستان سول ایوی ایشن اتھارٹی کا دورہ کرے گی، پاکستان سول ایوی ایشن کے لائسنس امتحانات، فلائٹ اسٹینڈرڈ، ایئر وردی نیس سمیت اسٹیٹ سیفٹی شعبوں کا آڈٹ شامل ہیں۔

(جاری ہے)

ذرائع کے مطابق ڈی جی سی اے اے کی ہدایت پر پاکستان سول ایوی ایشن اتھارٹی کے تمام شعبہ نے امریکی فیڈرل ایوی ایشن کے آڈٹ کی تیاری مکمل کرلی ہے۔امریکی فیڈرل ایوی ایشن اتھارٹی ٹیم کا پاکستان پہنچا امریکا کے لیے پاکستان سے براہ راست پروازوں کی اجازت کی طرف اہم پیش رفت ہے، پی آئی اے سمیت تمام پاکستانی ایئرلائنز کو امریکا کے لیے براہ راست پروازوں کی بحالی کی امید ہے۔