پاکستان کے تیز ترین ایتھلیٹ شجر عباس 4 ماہ کیلئے انٹرنیشنل سرکٹ سے آؤٹ

جمعہ 5 ستمبر 2025 20:20

اسلام آباد (اُردو پوائنٹ اخبارتازہ ترین - این این آئی۔ 05 ستمبر2025ء)پاکستان کے تیز ترین ایتھلیٹ شجر عباس بائیں ٹانگ کی سرجری کے بعد آئندہ 4 ماہ کے لیے انٹرنیشنل سرکٹ سے آؤٹ ہوگئے ہیں۔میڈیا رپورٹ کے مطابق قومی ایتھلیٹ شجر عباس کو ٹانگ کی سرجری کے بعد آرام کی ہدایت کی گئی ہے، 25 سالہ اسپرنٹر کی بائیں ٹانگ میں گزشتہ ماہ ٹیومر کی تشخیص ہوئی تھی۔

ٹیومر اور بعد ازاں سرجری کے حوالے سے پاکستان کے تیز ترین ایتھلیٹ شجر عباس نے بتایاکہ ٹریننگ کے دوران اچانک ٹانگ سوجھ گئی تھی، میڈیکل چیک میں ٹیومر کی تشخیص ہوئی۔

(جاری ہے)

اسپرنٹر کے مطابق ڈاکٹرز نے اٴْنہیں بتایا کہ ٹانگ سے کور اترنے میں 2 ماہ جب کہ مزید فٹنس حاصل کرنے میں مزید 3 سے 4 ماہ لگ سکتے ہیں۔شجر عباس سرجری کی وجہ سے رواں برس سعودی عرب میں شیڈول ورلڈ اسلامک گیمز سے دستبردار ہوگئے ہیں تاہم وہ نیشنل گیمز سمیت آئندہ برس عالمی مقابلوں میں شرکت سے قبل مکمل طور پر صحت یاب ہونے کے لیے پرعزم ہیں۔

واضح رہے کہ قومی اتھلیٹ نے 100 اور 200 میٹر ریس میں عالمی سطح پر 2 گولڈ اور ایک کانسی کا تمغہ پاکستان کے لیے جیت رکھا ہے، اس کے علاوہ 100 میٹر اسپرنٹ میں 10 اعشاریہ 34 سیکنڈز کے ریکارڈ کے ساتھ شجر عباس پاکستان کے تیز ترین ایتھلیٹ بن چکے ہیں۔