لاہور ہائیکورٹ میں موسم گرما کی تعطیلات ختم ،ججز ترمیمی روسٹر پر عملدرآمد شروع

پیر 8 ستمبر 2025 10:30

لاہور (اُردو پوائنٹ اخبارتازہ ترین - اے پی پی۔ 08 ستمبر2025ء) لاہور ہائیکورٹ میں موسم گرما کی تعطیلات ختم ہونے کے بعد ترمیم شدہ ججز روسٹر پر عملدرآمد شروع ہوگیا،اب تمام نوعیت کی درخواستوں اور اپیلوں پر سماعت ہوگی۔ پرنسپل سیٹ پر کیسز کی سماعت کے لیے ڈویژن اور سنگل بنچز تشکیل دے دیے گئے ،عدالتی اہلکاروں کے مطابق 10 ڈویژن بنچز ٹیکس، فوجداری، سول اور کمرشل اپیلوں پر سماعت کریں گے جبکہ حکم امتناعی، ضمانت، حبس بے جا، اندراج مقدمہ اور جائیداد سے متعلق کیسز کے لیے 24 سنگل بنچز بنائے گئے ہیں۔

(جاری ہے)

چیف جسٹس لاہور ہائیکورٹ کی منظوری کے بعد نیا روسٹر جاری کیا گیا۔چیف جسٹس کی سربراہی میں دو رکنی بنچ تمام نوعیت کی اپیلوں پر سماعت کرے گا۔ جسٹس عابد عزیز شیخ ٹیکس و کمرشل نوعیت کی اپیلوں، جسٹس حسن نواز مخدوم ٹیکس ریفرنسز، جسٹس شمس محمود مرزا بینکنگ و سول اپیلوں، جسٹس شہباز رضوی نیب و انسداد دہشت گردی اپیلوں، جسٹس فیصل زمان سول اپیلوں، جسٹس شہرام سرور چوہدری قتل و اقدام قتل سمیت فوجداری اپیلوں، جسٹس فاروق حیدر منشیات کیسز، جسٹس احمد ندیم ارشد سول اپیلوں جبکہ جسٹس سلطان تنویر احمد تمام نوعیت کی سول اپیلوں پر سماعت کریں گے۔