اے این ایف کا ایکشن،انسداد اسمگلنگ آپریشنز کے دوران 4 کروڑ 22 لاکھ سے زائد کی منشیات برآمد

پیر 8 ستمبر 2025 13:08

ہری پور، پشاور(اُردو پوائنٹ اخبارتازہ ترین - این این آئی۔ 08 ستمبر2025ء)ملک بھر میں انسداد اسمگلنگ آپریشنز کے دوران 4 کروڑ 22 لاکھ روپے سے زائد کی منشیات برآمد کرلی گئی۔ترجمان اینٹی نارکوٹکس فورس (اے این ایف) کے مطابق ملک بھر میں تعلیمی اداروں کے اطراف اور مختلف شہروں میں منشیات اسمگلنگ اور خرید و فروخت کے خلاف کریک ڈاؤن جاری ہے، اس دوران 7 مختلف کارروائیوں میں 8 ملزمان کو گرفتار کرکے 4 کروڑ 22 لاکھ روپے سے زائد مالیت کی 239 کلو منشیات برآمد کرلی گئی۔

اے این ایف حکام نے ہتار روڈ ہری پور میں یونیورسٹی کے قریب ملزم سے 400 گرام چرس برآمد کرلی جب کہ گرفتار ملزم نے تعلیمی اداروں کے طلبہ کو منشیات فروخت کرنے کا اعتراف بھی کیا ہے۔جی ٹی روڈ پشاور کے قریب گاڑی سے 46.800 کلو گرام افیون،26.400 کلو گرام چرس،2 کلو گرام آئس اور 1 کلو گرام ہیروئن برآمد کرکے ملزم کو گرفتار کرلیا گیا۔

(جاری ہے)

علاوہ ازیں گولڑہ موڑ اسلام آباد کے قریب گاڑی سے 7.200 کلو گرام چرس برآمد کرکے 3 ملزمان کو گرفتار کیا گیا۔

اُدھر فیض آباد اسلام آباد میں ملزم کے قبضے سے 2.400 کلو گرام چرس برآمد کرکے ملزم کو حراست میں لے لیا گیا۔ اسی طرح نیازی اڈہ لاہور کے قریب موٹر سائیکل سوار ملزم سے 13.200 کلو گرام چرس اور 2.400 کلو گرام آئس برآمد کی گئی۔علاوہ ازیں گرین ویلی شیخوپورہ کے قریب موٹر سائیکل سوار ملزم کے قبضے سے 13.200 کلو گرام افیون،3.600 کلو گرام چرس،280 گرام آئس اور ایک کلو ہیروئن برآمد کرلی گئی۔ اُدھر نوکنڈی چاغی کے قریب زمین میں چھپائی گئی 120 کلو گرام افیون برآمد کی گئی۔تمام کارروائیوں کے بعد انسداد منشیات ایکٹ کے تحت مقدمات درج کر کے تحقیقات کا آغاز کردیا گیا ہے۔