حکومت کا اسلام آباد میں اپنی طرز کا پہلا کمانڈ اینڈ کنٹرول سینٹر قائم کرنے کا فیصلہ

شہریوں کو تمام سروسز فراہم کی جائیں گی، نظام چلانے کیلئے ضروری سافٹ ویئر اور عملہ تعینات کیا جائے گا

ساجد علی پیر 8 ستمبر 2025 13:25

حکومت کا اسلام آباد میں اپنی طرز کا پہلا کمانڈ اینڈ کنٹرول سینٹر قائم ..

اسلام آباد ( اُردو پوائنٹ اخبارتازہ ترین۔ 08 ستمبر2025ء ) وفاقی حکومت نے اسلام آباد میں اپنی طرز کا پہلا کمانڈ اینڈ کنٹرول سینٹر قائم کرنے کا فیصلہ کرلیا۔ میڈیا رپورٹس کے مطابق حکومت نے اسلام آباد میں پہلا کمانڈ اینڈ کنٹرول سینٹر قائم کرنے کا فیصلہ کیا ہے، اس پائلٹ منصوبے کے تحت حکومتی سطح کا فیوژن سینٹر قائم ہوگا، فیوژن سینٹر میں شہریوں کو تمام سروسز فراہم کی جائیں گی، منصوبے کے ذریعے سمارٹ ٹریفک، فضائی معیار، کچرا اور ٹرانسپورٹ مینجمنٹ کو ممکن بنایا جائے گا۔

بتایا گیا ہے کہ وزارت آئی ٹی اینڈ ٹیلی کام نے سمارٹ اسلام آباد اقدام کے تحت یہ منصوبہ شروع کرنے کا اعلان کیا ہے، اس حوالے سے سامنے آنے والی سرکاری دستاویز کے مطابق کمانڈ اینڈ کنٹرول سینٹر میں اسلام آباد کے تمام متعلقہ محکموں کے افسران موجود ہوں گے، منصوبے کے تحت مزید سمارٹ ڈیوائسز اور سینسرز نصب کیے جائیں گے، شہری سہولتوں کے لیے ریئل ٹائم ڈیٹا سسٹم کو مزید مؤثر بنایا جائے گا، فیوژن سینٹر میں ریئل ٹائم ڈیٹا انٹیگریشن اور کمانڈ پلیٹ فارم قائم ہوگا۔

(جاری ہے)

دستاویز سے معلوم ہوا ہے کہ منصوبے کی مجموعی لاگت 70 کروڑ 83لاکھ 85 ہزار روپے مقرر کی گئی ہے، پلاننگ ڈویژن نے منصوبے کے لیے 25 کروڑ روپے کی منظوری دے دی ہے، منصوبے کا مقصد اے آئی پر مبنی پلیٹ فارم اور نیشنل ریپلیکیشن بلیوپرنٹ تیار کرنا ہے، منصوبے کے پہلے مرحلے میں کمانڈ اینڈ کنٹرول سینٹر قائم کیا جائے گا، نظام چلانے کے لیے ضروری سافٹ ویئر اور عملہ تعینات کیا جائے گا۔