آپریشن دوارکابحری تاریخ کا درخشندہ باب ،بحریہ کے جانبازوں نے دشمن کی اہم ساحلی تنصیبات کو تباہ کر کے کراچی پر حملے کا منصوبہ خاک میں ملادیا تھا، وزیرداخلہ محسن نقوی

پیر 8 ستمبر 2025 22:40

اسلام آباد (اُردو پوائنٹ اخبارتازہ ترین - اے پی پی۔ 08 ستمبر2025ء) وفاقی وزیرداخلہ محسن نقوی نے کہا ہے کہ پاک بحریہ کے بہادر سپوتوں کی عظیم قربانیوں اور بے مثال کارناموں کو خراج عقیدت پیش کرتے ہوئے کہا ہے کہ 8ستمبر1965کوسمندری سرحدوں کا دفاع کرکے پاک بحریہ نےتاریخ رقم کی تھی،بحری محاذ پر جرأت و قربانی کا نیا باب رقم کرنے والے جانباز قوم کے ہیرو ہیں۔

یوم بحریہ پر اپنے خصوصی پیغام میں محسن نقوی نے کہا کہ پاک بحریہ کے جانبازوں کو سلام پیش کرتے ہیں، یہ دن جانبازوں کی بہادری، پیشہ ورانہ مہارت اور فرض شناسی کی تابندہ علامت ہے۔ انہوں نے کہا کہ 1965 کی جنگ میں پاک بحریہ نے دشمن کے غرور کو پانی میں غرق کر کے سمندری محاذ پر بھی برتری ثابت کی تھی،جنگ ستمبر میں آپریشن “دوارکا” بحری تاریخ کا درخشندہ باب ہے۔

(جاری ہے)

پاک بحریہ کے جانبازوں نے چند لمحوں میں دشمن کی اہم ساحلی تنصیبات کو تباہ کر کے سمندری جنگ کا نقشہ بدل دیا اور کراچی پر حملے کا منصوبہ خاک میں ملایا تھا،آپریشن دوارکا کے بعد معرکہ حق میں بھی پاک بحریہ الرٹ رہی اوردشمن کراچی پر حملے کی جرات نہیں کر سکا۔ وفاقی وزیرداخلہ محسن نقوی نے کہا کہ پاک بحریہ نے اپنی پیشہ وارانہ تیاریوں، تنظیم اور جذبہ سرفروشی سے دشمن کو حیران کر دیا،یومِ بحریہ نہ صرف ایک تاریخی دن ہے بلکہ ایک تسلسل ہے اُس عہد، اُس جذبے اور اُس یقین کا جو سمندر کی وسعتوں میں پروان چڑھا۔

آج پاک بحریہ جدید ٹیکنالوجی، میزائل سسٹمز اور خود انحصاری کے ساتھ ایک مضبوط اور مؤثر بحری قوت کے طور پر سامنے آ چکی ہے۔انہوں نے کہا کہ عالمی بحری مشقوں میں شمولیت، علاقائی میری ٹائم سیکیورٹی میں قائدانہ کردار اور سفارتی سطح پر سرگرم شراکت پاک بحریہ کی قابل فخر پہچان بن چکی ہے،قوم کو سمندری محافظوں پر ناز ہے، جنہوں نے پیشہ ورانہ مہارت اور حکمت عملی سے بحری سرحدوں کو ناقابلِ تسخیر بنا دیااور پاک بحریہ8 ستمبر1965کے جذبے کو زندہ جاوید رکھنے کے لئے پر عزم ہے۔