کرس گیل پھٹ پڑے، آئی پی ایل سے جلدی ریٹائرمنٹ کی وجہ بتادی

آپ نے فرنچائز کے لیے اتنا کچھ کیا لیکن عزت نہ دی جائے اور بچوں جیسا رویہ ہو تو افسوس ہوتا ہے: سابق ویسٹ انڈین کرکٹر

ذیشان مہتاب منگل 9 ستمبر 2025 10:38

کرس گیل پھٹ پڑے، آئی پی ایل سے جلدی ریٹائرمنٹ کی وجہ بتادی

لاہور (اردو پوائنٹ تازہ ترین اخبار ۔ 9 ستمبر 2025ء ) ویسٹ انڈیز کے سابق کرکٹر کرس گیل انڈین پریمیئر لیگ (آئی پی ایل) پر پھٹ پڑے۔ کرس گیل نے ایک انٹرویو میں انکشاف کیا کہ آئی پی ایل میں ان کی ٹیم کنگز الیون پنجاب نے انہیں عزت نہیں دی، عزت نہ ملنے کی وجہ سے آئی پی ایل سے جلد ریٹائرمنٹ لی۔

واضح رہے کہ 2021ء میں آئی پی ایل کووڈ کیسز میں اضافے کے سبب مئی میں معطل کر دی گئی تھی اور پھر اس ہی برس ستمبر میں یو اے ای میں مکمل کروائی گئی تھی۔

کرس گیل نے لیگ دوبارہ شروع ہونے کے بعد پنجاب کنگز کی جانب سے دو میچز کھیلے اور پھر مبینہ طور پر ’ببل فٹیگ‘ کی وجہ سے آئی پی ایل کا بائیو سیکیور ماحول چھوڑنے کا فیصلہ کیا۔

کئی برسوں بعد اب کرس گیل نے لیگ چھوڑنے سے متعلق درست وجوہات بتاتے ہوئے کہا ہے کہ پنجاب کنگز میں ان کے ساتھ درست رویہ نہیں رکھا گیا۔

(جاری ہے)

کنگز الیون پنجاب کی طرف سے 4 سیزن کھیلنے والے کرس گیل کا کہنا تھا میرا آئی پی ایل میں پنجاب کنگز کے ساتھ معاہدہ وقت سے پہلے ختم ہوا، میں نے محسوس کیا کہ سینئر کھلاڑی کی حیثیت سے میرے ساتھ اچھا برتاؤ نہیں کیا جا رہا۔

سابق ویسٹ انڈین کرکٹر کا کہنا تھا آپ نے فرنچائز کے لیے اتنا کچھ کیا لیکن عزت نہ دی جائے بچوں جیسا رویہ ہو تو افسوس ہوتا ہے، مجھے ایسا لگا جیسے میرے کندھوں پر بلڈنگ جتنا بوجھ ہو، زندگی میں پہلی مرتبہ ڈپریشن موڈ میں گیا، آپ کی مینٹل ہیلتھ پیسے سے زیادہ اہم ہے۔

کرس گیل کا کہنا تھا میں نے انیل کمبلے کو کال کی اور ان سے ون آن ون بات ہوئی، یقین جانیں گفتگو کے دوران میں دلبرداشتہ ہو کر رو پڑا تھا، مجھے انیل کمبلے سے بہت دکھ تھا، میں نے ان کا شکریہ ادا کیا، میں اس وقت بات بھی جاری نہیں رکھ پا رہا تھا۔

سابق ویسٹ انڈین کرکٹر کا کہنا تھا آئی پی ایل ٹیم کے کپتان کے ایل راہول نے کال کی اور کہا کرس تم یہاں رکنا چاہتے ہو تم اگلا میچ کھیلو گے، میں نے کہا کہ سنو آپ سب کھلاڑیوں کو آل دی بیسٹ، میں نے اپنا سامان باندھا اور چلا گیا۔