پاکستان اور قازقستان کے درمیان مشترکہ دلچسپی کے متعدد شعبوں میں دوطرفہ تعاون کو مزید مضبوط بنانے کے خواہاں ہیں ، وزیراعظم محمد شہباز شریف کی قازقستان کے نائب وزیر اعظم و وزیر خارجہ مورات نورتیلو سے ملاقات میں گفتگو

اسلام آباد (اُردو پوائنٹ اخبارتازہ ترین - اے پی پی۔ 09 ستمبر2025ء) وزیراعظم محمد شہباز شریف نے کہا ہے کہ پاکستان اور قازقستان کے درمیان مضبوط برادرانہ تعلقات ہیں، مشترکہ دلچسپی کے متعدد شعبوں میں دوطرفہ تعاون کو مزید مضبوط بنانے کے خواہاں ہیں ۔منگل کو وزیراعظم آفس کی میڈیا ونگ سے جاری بیان کے مطابق انہوں نے ان خیالات کا اظہار قازقستان کے نائب وزیر اعظم اور وزیر خارجہ مورات نورتیلو سے گفتگو کرتے ہوئے کیا جنہوں نے وزیر اعظم ہائوس میں ان سے سے ملاقات کی۔

نائب وزیر اعظم و وزیر خارجہ اسحاق ڈار،وفاقی وزیر مواصلات عبد العلیم خان، وفاقی وزیر برائے اقتصادی امور احد خان چیمہ،وفاقی وزیر ریلوے حنیف عباسی، وزیر اعظم کے معاون خصوصی طارق فاطمی اور سیکرٹری خارجہ بھی ملاقات میں موجود تھے۔

(جاری ہے)

وزیراعظم نے قازقستان کے نائب وزیر اعظم کا پاکستان کے پہلے دورے پر خیرمقدم کرتے ہوئے قازقستان کے صدر قاسم جومارت توکایوف کے لیے اپنی نیک خواہشات کا اظہار کیا۔

انہوں نے کہا کہ پاکستان اور قازقستان کے درمیان مضبوط برادرانہ تعلقات ہیں اور دونوں ممالک میں مشترکہ دلچسپی کے متعدد شعبوں میں دوطرفہ تعاون کو مزید مضبوط بنانے کی باہمی خواہش ہے۔ وزیراعظم نے قازقستان کے ساتھ دوطرفہ تجارت، سرمایہ کاری، رابطوں (فضائی، ریل اور سڑک کے ذریعہ) اور عوام کی سطح پر رابطہ کے لئے پاکستان کی خواہش کا اظہار کیا۔

وزیر اعظم نے کہا کہ قازقستان کے صدر کا پاکستان کا دورہ بہت اہمیت کا حامل ہو گا۔ وزیر اعظم نے مختلف مفاہمتی یادداشتوں اور زیر غور معاہدوں کو حتمی شکل دینے کے لیے ایک وفد آستانہ بھیجنے کی پیشکش کی۔ دونوں فریق اس حوا لہ سے پچھلے کئی مہینوں سے باقاعدہ بات چیت کرتے رہے ہیں اور توقع ہے کہ اس سال کے آخر میں قازقستان کے صدر کے دورہ کے دوران دونوں ممالک کے درمیان اہم مفاہمتوں اور معاہدوں پر دستخط ہوں گے۔

 قازقستان کے نائب وزیر اعظم نے بھرپور مہمان نوازی پر وزیر اعظم کا شکریہ ادا کیا اور انہیں نائب وزیر اعظم اور وزیر خارجہ سینیٹر محمد اسحاق ڈار کے ساتھ اپنی تفصیلی بات چیت سے آگاہ کیا۔ انہوں نے اس بات کا اظہار کیا کہ صدر توکایوف کا آئندہ دورہ اسلام آباد انتہائی تاریخی اور کامیاب ہو گا اور اس سے پاکستان اور قازقستان تعلقات میں ایک نئے دور کا آغاز ہو گا۔