پنجاب حکومت کی فلورملزمالکان کو3 روز کی مہلت، اسٹاک رجسٹریشن نہ کرانے پر سخت کارروائی کا فیصلہ

پنجاب میں گندم اور آٹے کی قیمتوں میں استحکام حکومت کی اولین ترجیح ہے، گندم کا ایک دانہ بھی ضائع نہیں ہونے دیا جائے گا، وزیراطلاعات و ثقافت پنجاب عظمی بخاری

ثنااللہ ناگرہ منگل 9 ستمبر 2025 19:25

پنجاب حکومت کی فلورملزمالکان کو3 روز کی مہلت، اسٹاک رجسٹریشن نہ کرانے ..

لاہور (اُردو پوائنٹ اخبارتازہ ترین۔ 09 ستمبر2025ء) وزیراطلاعات و ثقافت پنجاب عظمی بخاری نے کہا ہے کہ وزیراعلیٰ پنجاب کی واضح ہدایت ہے کہ گندم کا ایک بھی دانہ ضائع نہیں ہونے دیا جائے گا۔ خانیوال میں گندم کے نقصان پر وزیر اعلیٰ نے سخت ناراضگی کا اظہار کرتے ہوئے ڈی جی فوڈ سمیت متعلقہ افسران کو معطل کردیا ہے۔انہوں نے کہا کہ صوبے میں گندم اور آٹے کی کوئی کمی نہیں ہے، فلور ملز مالکان کو تین دن کی مہلت دی گئی ہے کہ اپنے اسٹاک کی رجسٹریشن کروائیں، بصورت دیگر سخت قانونی کارروائی کی جائے گی۔

حکومت پنجاب عوام کو مہنگے آٹے کے ذریعے قتل نہیں ہونے دے گی اور روٹی کی قیمت پر کوئی سمجھوتہ نہیں کیا جائے گا۔ عظمی بخاری نے مزید کہا کہ وزیراعلیٰ پنجاب نے فلور ملز مالکان سے ملاقات کی ہے اور واضح پیغام دیا ہے کہ ناجائز منافع خوری برداشت نہیں کی جائے گی۔

(جاری ہے)

حکومت کسی کو منافع کمانے سے نہیں روکتی، لیکن عوام کی جیب پر ڈاکہ ڈالنے کی اجازت نہیں دی جائے گی۔

انہوں نے کہا کہ چینی کی سرکاری قیمت پر ہر صورت عمل درآمد کرایا جائے گا، جبکہ آٹے کی قیمت پر بھی سختی سے کنٹرول کیا جائے گا۔اس موقع پر انہوں نے صحافی طیب بلوچ پر ہونے والے تشدد کے واقعہ کی شدید مذمت کرتے ہوئے کہا کہ آزادی اظہار پر قدغن کسی صورت برداشت نہیں کی جائے گی۔ جب ہم ان کو فساد پارٹی کہتے ہیں تو برا مناتے ہیں، لیکن دوسروں پر الزام تراشی ان کا وطیرہ ہے۔

یہ نہیں ہوسکتا کہ صرف وہی درست ہوں جو انہیں پسند ہو۔”وزیر اطلاعات نے کہا کہ ماضی میں سیاسی ورکرز پر دہشت گردی کے مقدمے قائم کیے گئے، مگر آج وہی ورکرز ووٹ ڈالنے کے حق سے سرفراز ہیں۔“عزت اور ذلت اللہ کے ہاتھ میں ہے۔”انہوں نے کہا کہ پنجاب حکومت عوام کے حقوق کے تحفظ کے لیے ہر ممکن اقدام کر رہی ہے اور کسی کو عوامی مفاد کے ساتھ کھیلنے کی اجازت نہیں دی جائے گی۔