Live Updates

وفاقی حکومت کا ملک بھر میں بجلی کے میٹرز تبدیل کرنے کا فیصلہ

موجودہ بجلی میٹروں کو سمارٹ میٹرز کے ساتھ تبدیل کیے جانے سے بجلی کے استعمال کی درست مانیٹرنگ اور بلنگ ممکن ہوسکے گی، جس سے بجلی چوری میں بھی نمایاں کمی آئے گی؛ حکام وزارت توانائی

ساجد علی بدھ 10 ستمبر 2025 12:18

وفاقی حکومت کا ملک بھر میں بجلی کے میٹرز تبدیل کرنے کا فیصلہ

اسلام آباد ( اُردو پوائنٹ اخبارتازہ ترین۔ 10 ستمبر 2025ء ) وفاقی حکومت کی جانب سے ملک بھر میں تھری فیز میٹرز کو جدید اے ایم آئی اسمارٹ میٹرز سے تبدیل کرنے کا فیصلہ کرلیا گیا۔ میڈیا رپورٹس کے مطابق وزارت توانائی حکام کا کہنا ہے کہ بجلی چوری پر قابو پانے اور زائد بلنگ کو روکنے کے لیے ملک بھر میں تھری فیز میٹرز کو تبدیل کرنے کا فیصلہ کیا گیا، یہ منصوبہ مرحلہ وار شروع کیا جائے گا اور ابتدائی مرحلے میں بجلی کے 3 لاکھ 50 ہزار میٹرز تبدیل کیے جائیں گے۔

بتایا گیا ہے کہ بجلی کے میٹرز کی تبدیلی کے حوالے سے تمام بجلی تقسیم کار کمپنیوں کو باظابطہ ہدایات جاری کر دی گئی ہیں، پہلے مرحلے میں لاہور الیکٹرک سپلائی کمپنی (لیسکو) کی طرف سے صارفین کے 3 لاکھ 50 ہزار میٹرز تبدیل کیے جائیں گے اور یہ تنصیب باقاعدہ میٹر ریپلیسمنٹ آرڈر کے تحت کی جائے گی، لاہور الیکٹرک سپلائی کمپنی (لیسکو) کو بڑے پیمانے پر تنصیب کے باعث اربوں روپے کے اخراجات برداشت کرنے ہوں گے۔

(جاری ہے)

اس حوالے سے حکام کا مزید یہ بھی کہنا ہے کہ اس منصوبے کو دسمبر 2026 تک مکمل کرنے کی ڈیڈ لائن دی گئی ہے جس کے بعد پورے ملک میں سمارٹ میٹرز کا استعمال لازمی ہو جائے گا، موجودہ بجلی میٹروں کو سمارٹ میٹرز کے ساتھ تبدیل کیے جانے سے بجلی کے استعمال کی درست مانیٹرنگ اور بلنگ ممکن ہوسکے گی، جس سے بجلی چوری میں بھی نمایاں کمی آئے گی۔ دوسری طرف حکومت نے سیلاب متاثرین کو بجلی کے بلوں میں ریلیف دینے کا فیصلہ بھی کیا ہے، جس کی تصدیق کرتے ہوئے وفاقی وزیر غذائی تحفظ رانا تنویر حسین نے بتایا کہ فوی طور پر سیلاب متاثرین کے بلوں پر ٹیکس معاف کیے جائیں گے، سیلاب متاثرین کے بجلی کے بلوں پر ٹیکس ختم کرنے کیلئے کام کیا جارہا ہے، بجلی کے بلوں میں ریلیف وفاقی حکومت دے گی، لینڈ ریونیو صوبائی حکومت معاف کرے گی، سیلاب زدہ علاقوں میں بجلی کے اضافی بلوں کا نوٹس لیں گے، یہ وہ بل ہوں گے جو پہلے ہی پرنٹ ہوچکے ہیں۔