پاکستان سے حلال گوشت کی برآمدات کے وسیع امکانات موجود ہیں،صدرچیمبر

بدھ 10 ستمبر 2025 13:19

فیصل آباد (اُردو پوائنٹ اخبارتازہ ترین - اے پی پی۔ 10 ستمبر2025ء) فیصل آباد چیمبر آف کامرس اینڈ انڈسٹری کے صدرریحان نسیم بھراڑہ نے کہا کہ پاکستان سے حلال گوشت کی برآمدات کے وسیع امکانات موجود ہیں مگر ابھی تک ہم ان شعبوں کو جدید سائنسی خطوط پر ترقی ہی نہیں دے سکے جس کی وجہ سے ان شعبوں میں عالمی سطح پر پاکستان کا حصہ نہ ہونے کے برابر ہے۔انہوں نے بتایاکہ پاکستان کا دودھ پیدا کرنیوالے ملکوں میں چوتھانمبر ہے اسی طرح پاکستان نہ صرف پھلوں کی پیداوارمیں خودکفیل ہے جبکہ ان کا ایک بڑا حصہ ضائع بھی ہو جاتا ہے لہٰذا اس ضیاع کو روکنے کیلئے بھی اقدامات اٹھانا ہوں گے۔

انہوں نے کہا کہ پنجاب میں ڈیری، ہارٹیکلچر اور لائیو سٹاک کے شعبوں کو جدید خطوط پر استوار کرنے کی ضرورت ہے مگر ان اہم شعبوں میں سرمایہ کاری کرنے والوں کو ٹرن کی یا روڈ میپ ہی میسر نہیں۔

(جاری ہے)

انہوں نے بتایا کہ چیمبر نے مختلف ممالک کے سفیروں کو مدعوکرنے کا سلسلہ شروع کررکھاہے تاکہ ان کے ساتھ مختلف صنعتی، کاروباری، تجارتی، درآمدی، برآمدی شعبوں میں تعاون کے امکانات پر تبادلہ خیال یقینی بنایاجاسکے۔

انہوں نے کہا کہ پاکستان کی مجموعی ترقی کا تمامتر انحصار چھوٹے و درمیانے درجے کے کاروباری اداروں پرہے لہٰذاحکومت معاشی ترقی کیلئے کاروباری طبقہ کو خصوصی سہولیات کی فراہمی یقینی بنائے نیز پنجاب میں صنعت و تجارت کے فروغ کیلئے سازگار ماحول پیدا کرنے کیلئے بزنس کمیونٹی، حکومت پنجاب اور یو ایس ایڈ کو مربوط اور منظم کوششیں کرنا ہونگی۔