لاہور سے جدہ جانے والی 2 پروازوں کی کراچی میں ہنگامی لینڈنگ

طیارے گراﺅنڈ کردیئے گئے‘مسافروں کو تیسری بار متبادل طیارے کے لیے انتظار کرنے کی زحمت اٹھانا پڑی

میاں محمد ندیم بدھ 10 ستمبر 2025 15:17

لاہور سے جدہ جانے والی 2 پروازوں کی کراچی میں ہنگامی لینڈنگ

کراچی(اردوپوائنٹ اخبارتازہ ترین-انٹرنیشنل پریس ایجنسی۔10 ستمبر ۔2025 )جدہ روانہ ہونے والے عمرہ زائرین کو گزشتہ 24گھنٹوں کے دوران 2 الگ الگ ہنگامی صورتحال کا سامنا کرنا پڑا ایئرلائن ذرائع کے مطابق پہلی پرواز، پی اے 470، ایئربس اے 320 رات گئے لاہور سے جدہ کے لیے روانہ ہوئی، تاہم دورانِ پرواز طیارے کے موسمی ریڈار میں اچانک فنی خرابی پیش آگئی جس کے بعد پائلٹ نے طیارے کو بحفاظت کراچی ایئرپورٹ پر اتارنے کا فیصلہ کیا.

(جاری ہے)

بعد ازاں تمام مسافروں کو ہوٹل منتقل کر دیا گیا اور طیارے کو مزید پرواز کے قابل نہ سمجھتے ہوئے گراﺅنڈ کر دیا گیا ایئرلائن انتظامیہ نے فوری طور پر مسافروں کی سہولت کے لیے متبادل طیارے کا بندوبست کرکے زائرین کو دوبارہ جدہ کے لیے روانہ کیا گیا لیکن روانگی کے فورا بعد ہی جہاز کو ایک اور حادثاتی صورتحال کا سامنا کرنا پڑا جہاں ٹیک آف کے چند لمحوں بعد ہی طیارے سے ایک پرندہ ٹکرا گیا، جس پر پائلٹ نے ایئر ٹریفک کنٹرول کو اطلاع دی اور حفاظتی اقدامات کے تحت پرواز کو واپس کراچی ایئرپورٹ پر اتار لیا ترجمان کے مطابق دوسرا طیارہ بھی گراﺅنڈ کر دیا گیا ہے تاکہ مکمل معائنہ کیا جا سکے.