Live Updates

جلالپور پیروالا کی سیلابی صورتحال انتہائی خراب، ملتان میں بھی تشویشناک، جنوبی پنجاب بڑا چیلنج قرار

جلالپور پیروالا کو تین دریاؤں راوی، چناب اور ستلج کا پانی متاثر کررہا ہے، مظفرگڑھ، لیاقت پور اور رحیم یارخان کی صورتحال تشویشناک ہوگی؛ ڈی جی پی ڈی ایم اے پنجاب عرفان علی کاٹھیا کی گفتگو

ساجد علی بدھ 10 ستمبر 2025 15:46

جلالپور پیروالا کی سیلابی صورتحال انتہائی خراب، ملتان میں بھی تشویشناک، ..

ملتان ( اُردو پوائنٹ اخبارتازہ ترین۔ 10 ستمبر 2025ء ) پروونشل ڈیزاسٹر مینجمنٹ اتھارٹی ( پی ڈی ایم اے) نے جلالپور پیروالا میں سیلابی صورتحال انتہائی خراب اور ملتان کی تشویشناک بتاتے ہوئے جنوبی پنجاب کو بڑا چیلنج قرار دے دیا۔ جیو نیوز کے پروگرام میں گفتگو کرتے ہوئے ڈی جی پی ڈی ایم اے پنجاب عرفان علی کاٹھیا نے کہا کہ جلالپور پیر والا کی صورتحال انتہائی خراب ہے کیوں کہ جلالپور پیروالا کو تین دریاؤں راوی، چناب اور ستلج کا پانی متاثر کررہا ہے، چند گھنٹے پہلے ایک شگاف پڑنے سے پانچ چھ مزید آبادیاں متاثر ہونے کا خدشہ ہے جہاں سے تمام لوگوں کے انخلاء کو یقینی بنایا جارہا ہے۔

انہوں نے بتایا کہ 175 سے زائد ریسکیو کی بوٹس جلال پور پیروالا میں کام کررہی ہیں، لوگوں نے انخلا سے گریز کیا، جو ہمارے لیے ایک چیلنج بن گیا، شگاف پر کرنے کے لیے تمام مشینری کام کررہی ہے، پاک آرمی ایک ہفتہ سے ریسکیو کے ساتھ جلالپور پیروالا میں موجود ہے، بھارت سے راوی اور ستلج میں پانی چھوڑنے کا سلسلہ رک چکا ہے، بھارت صرف اپنی ضرورت کے مطابق اپنی ڈاؤن اسٹریم نہروں میں پانی چھوڑ رہا ہے۔

(جاری ہے)

ڈی جی پی ڈی ایم اے کا کہنا ہے کہ نارووال، شیخوپورہ، لاہور، ننکانہ میں پانی کے بہاؤ میں بتدریج کمی آرہی ہے، سیالکوٹ، گوجرانوالہ، وزیرآباد، حافظ آباد، چنیوٹ میں کافی تیزی سے پانی اتر رہا ہے، پانی اترنے والے علاقوں میں ریلیف کیمپوں سے لوگ واپس جارہے ہیں لیکن اگلے تین دن کا بڑا چیلنج ساؤتھ پنجاب ہے جہاں ملتان کی صورتحال تشویشناک ہے، مظفرگڑھ، لیاقت پور اور رحیم یارخان کی صورتحال تشویشناک ہوگی۔