اسرائیل زمینی لڑائی سے خوفزدہ ہے اس لیے صرف فضائی بمباری کر رہا ہے، مولانا فضل الرحمان

بدھ 10 ستمبر 2025 16:56

اسلام آباد (اُردو پوائنٹ اخبارتازہ ترین - این این آئی۔ 10 ستمبر2025ء) جمعیت علمائے اسلام (ف)کے سربراہ مولانا فضل الرحمان نے کہا ہے کہ اسرائیل زمینی لڑائی سے خوفزدہ ہے اس لیے صرف فضائی بمباری کر رہا ہے۔ اپنے ایک بیان میں مولانا فضل الرحمان نے کہا کہ قطر میں حماس کی قیادت پر حملے کی جے یو آئی اور عوام سخت مذمت کرتے ہیں، یہ حملہ مسلم اور عرب دنیا کی خودمختاری پر حملہ ہے۔

مولانا فضل الرحمان نے کہا کہ حماس کی قیادت امریکی صدر کی جنگ بندی کی پیشکش پر مشاورت کیلئے جمع تھی، حملے میں مغربی فضائیہ کے انٹیلی جنس اور ایندھن بردار طیارے استعمال ہوئے۔انہوں نے کہا کہ الحمد للّٰہ خالد مشعل محفوظ ہیں، دشمن قاتلانہ حملے میں ناکام رہا، او آئی سی فوراً حماس کی قیادت کو مکمل تحفظ فراہم کرے، ہزاروں فلسطینی مسجد اقصیٰ اور فلسطین کی آزادی کے لیے قربانیاں دے چکے ہیں۔

(جاری ہے)

مولانا فضل الرحمان نے کہا کہ غزہ کے عوام بھوک، پیاس اور اسرائیلی محاصرے کا شکار ہیں۔ مغربی حمایت یافتہ اسرائیلی افواج خواتین، بچوں اور بزرگوں پر بم گرا رہی ہیں، مسلم رہنماؤں کی خاموشی سے غزہ میں ہلاکتیں بڑھ رہی ہیں۔مولانا فضل الرحمان نے کہا کہ عالمی صمود فلوٹیلا کے بہادر کارکنوں کی مکمل حمایت کرتے ہیں، اسرائیل نے مرکزی جہاز پر ڈرون حملہ کیا مگر کارکنوں کا حوصلہ بلند ہے، یہ قربانیاں مسلم حکمرانوں کی مجرمانہ غفلت کو بے نقاب کر رہی ہیں۔انہوںنے کہاکہ اقوام متحدہ سلامتی کونسل فوری طور پر غزہ کا محاصرہ ختم کرائے، فلسطینی عوام کے ساتھ پہلے کی طرح کھڑے ہیں، انشائ اللّٰہ فلسطین اور مسجد اقصیٰ کو ناجائز قبضے سے آزاد کرایا جائے گا۔