Live Updates

پنجاب میں سیلاب متاثرین کو ایئرلفٹ کرنے کیلئے 200 کلو تک وزن اٹھانے والا ڈرون متعارف

سیکریٹری داخلہ پنجاب نے سیلاب متاثرین کو ریسکیو کرنے کیلئے جدید ایئر لفٹ ڈرون ملتان بھجوانے کی ہدایت کردی

ساجد علی بدھ 10 ستمبر 2025 16:22

لاہور ( اُردو پوائنٹ اخبارتازہ ترین۔ 10 ستمبر 2025ء ) صوبہ پنجاب میں سیلاب متاثرین کو ایئرلفٹ کرنے کیلئے 200 کلو تک وزن اٹھانے والا ڈرون متعارف کرادیا گیا۔ تفصیلات کے مطابق پاکستان نے ریسکیو اینڈ ریلیف آپریشنز کے لیے اہم سنگ میل عبور کرتے ہوئے حکومت پنجاب نے سیلاب متاثرین کے لیے ایئر لفٹ ڈرون حاصل کرلیا، یہ جدید ڈرون 200 کلو تک وزنی شخص کو اٹھا کر محفوظ مقام تک منتقل کرنے کی صلاحیت رکھتا ہے۔

بتایا گیا ہے کہ سیکریٹری داخلہ پنجاب نے سیلاب متاثرین کو ریسکیو کرنے کے لیے جدید ایئر لفٹ ڈرون ملتان بھجوانے کی ہدایت کی ہے تاہم جنوبی پنجاب بھجوانے سے قبل لاہور میں سول ڈیفنس کی جانب سے ڈرون کی ٹیسٹ فلائٹس مکمل کی گئیں، سیکریٹری داخلہ نے بتایا کہ سول ڈیفنس کے لیے مزید 10 ایئرلفٹ ڈرونز کی خریداری کا فیصلہ کیا گیا ہے، پاکستان میں یہ اپنی طرز کی پہلی ایمرجنسی ایئرلفٹ ڈرون سروس ہے، محکمہ داخلہ پنجاب سول ڈیفنس ریزیلئنس کور کو جدید خطوط پر استوار کر رہا ہے۔

(جاری ہے)

ان کا کہنا ہے کہ ڈرون سروس سے ناقابل رسائی اور خطرناک مقامات سے انسانوں کو محفوظ انداز میں ایئرلفٹ کیا جاسکتا ہے، سیلاب و ہنگامی صورتحال میں سول ڈیفنس کے جوان فرنٹ لائن سولجرز ہیں، سول ڈیفنس کے تربیت یافتہ اہلکار و رضاکار قیمتی انسانی جانیں بچا رہے ہیں، سول ڈیفنس ریزیلئنس کور میں شہریوں کی بطور رضاکار رجسٹریشن کا عمل جاری ہے، سیلاب متاثرین کی امداد کے لیے رواں ہفتے 4 ہزار سے زائد رضاکار رجسٹریشن کروا چکے ہیں۔