پاکستانی نشانہ باز اسد واحد کی شاندار کارکردگی، یورپی ایف کلاس چیمپئن شپ میں سلور میڈل جیت کر قومی پرچم سر بلند

بدھ 10 ستمبر 2025 22:56

برسلز (اُردو پوائنٹ اخبارتازہ ترین - آن لائن۔ 10 ستمبر2025ء) پاکستانی نشانہ باز اسد واحد نے یورپی ایف کلاس چیمپئن شپ میں اپنی لاجواب کارکردگی سے نہ صرف ملک کا نام روشن کیا بلکہ عالمی سطح پر پاکستان کا پرچم فخر سے بلند کر دیا۔ برطانیہ کے تاریخی بزلی شوٹنگ گراؤنڈ میں ہونے والے اس مقابلے میں اسد واحد نے 1000 گز کے مقابلے میں سلور میڈل اپنے نام کیا۔

450 میں سے 419 پوائنٹس حاصل کرتے ہوئے وہ ٹاپ 5 شوٹرز میں شامل ہوئے اور ایف اوپن کیٹیگری میں روٹ لینڈز ٹیم میچ میں بھی سلور میڈل حاصل کیا۔

(جاری ہے)

اس مقابلے میں امریکا، کینیڈا، جرمنی، برطانیہ اور پاکستان سمیت 400 سے زائد عالمی شہرت یافتہ کھلاڑی حصہ لے رہے تھے۔اسد واحد نے ایف ٹی آر کیٹیگری میں پاکستان کی نمائندگی کرتے ہوئے 208 کھلاڑیوں کا مقابلہ کیا اور "تھری لائنز" ٹیم کی قیادت کرتے ہوئے آسٹریلیا، انگلینڈ، نیوزی لینڈ اور اٹلی جیسی مضبوط ٹیموں کو شکست دی۔

ان کی مسلسل بہترین کارکردگی کو ٹاپ 5 اوورآل ایوارڈ سے بھی تسلیم کیا گیا۔برٹش نیشنل لیگ سمیت متعدد قومی و بین الاقوامی ٹرافیاں جیتنے والے اسد واحد کی یہ کامیابی صرف انفرادی نہیں بلکہ پورے ملک کے لیے فخر کا باعث ہے، جو پاکستان کی اسپورٹس میں بڑھتی ہوئی عالمی شناخت کا ثبوت ہے۔