وفاقی وزیر داخلہ کا77ویں برسی پر قائد اعظم محمد علی جناح کو خراج عقیدت، بابائے قوم نے مسلمانان ہند کو ایک نظریہ، شعور اور خودمختار ریاست عطا کی، محسن نقوی

جمعرات 11 ستمبر 2025 16:35

اسلام آباد (اُردو پوائنٹ اخبارتازہ ترین - اے پی پی۔ 11 ستمبر2025ء) وفاقی وزیر داخلہ محسن نقوی نے بابائے قوم قائداعظم محمد علی جناحؒ کی 77ویں برسی پر ان کی عظیم جدوجہد کو خراج عقیدت پیش کیا ہے۔اپنے پیغام میں محسن نقوی نے کہا کہ قائداعظمؒ نے مسلمانان ہند کو ایک نظریہ، شعور اور خودمختار ریاست عطا کی، انہوں نے برصغیر کے مسلمانوں کو غلامی سے نکال کر ایک آزاد وطن کی منزل تک پہنچایا۔

وزیر داخلہ کے مطابق جناحؒ کی شخصیت کردار کی بلندی، گفتار کی سچائی اور عمل کی یکسوئی کا ایسا امتزاج تھی جو تاریخ میں کم ہی دیکھنے کو ملتا ہے۔ انہوں نے انتھک محنت، ہمت اور استقلال سے ایک قوم کو منزل سے ہمکنار کیا۔ وزیر داخلہ نے کہا کہ قائداعظمؒ ایسا پاکستان چاہتے تھے جہاں ہر فرد کو انصاف، برابری اور عزت حاصل ہو، اقلیتوں کے حقوق کے حوالے سے ان کا موقف ریاستی اخلاقیات کی معراج تھا جبکہ خواتین کو انہوں نے قومی تعمیر کا بنیادی ستون قرار دیا۔

(جاری ہے)

محسن نقوی نے کہا کہ محمد علی جناحؒ کے نزدیک قیادت کا اصل جوہر ذاتی مفاد سے بلند ہو کر قومی مفاد کے لیے سوچنا ہے، وہ ریاست کو عوام کی امانت سمجھتے تھے۔انہوں نے کہا کہ جناحؒ کا پاکستان ایک منصف، باوقار، علم دوست، مساوات اور باہمی احترام پر قائم ریاست ہے، 77 سال بعد بھی ان کی فکر آج ہمارے فیصلوں، سمتوں اور قومی وجود کا پیمانہ ہے، ایمان، اتحاد اور تنظیم جناحؒ کی اصل امانت اور یہی پاکستان کی روح ہیں۔\932