Live Updates

جنوبی پنجاب میں ریسکیو آپریشن کے دوران کشتیاں الٹنے کے مزید واقعات، اموات کی تعداد 30 ہوگئی

اس طرح کےحادثات کے نمبر بہت کم ہیں،جتنی بڑی آفت ہے،اس میں چھوٹے موٹے حادثات ہو جاتے ہیں، ڈاکٹررضوان

فیضان ہاشمی جمعہ 12 ستمبر 2025 10:35

جنوبی پنجاب میں ریسکیو آپریشن کے دوران کشتیاں الٹنے کے مزید واقعات، ..

لیاقت پور(اُردو پوائنٹ اخبارتازہ ترین۔ 12 ستمبر2025ء)جنوبی پنجاب میں ریسکیو آپریشن کے دوران کشتیاں الٹنے کے مختلف واقعات میں ہلاکتوں کی تعداد 30 تک پہنچ گئی۔ لیاقت پور، جلال پور پیروالا، منچن آباد، علی پور اور اُچ شریف میں دس کے قریب حادثات پیش آئے، جاں بحق افراد میں زیادہ تر خواتین، بچے اور بزرگ شامل ہیں۔ حکام کے مطابق آٹھ سے زائد افراد اب بھی لاپتہ ہیں جن کی تلاش کے لیے ریسکیو ٹیمیں مسلسل کارروائی کر رہی ہیں۔

ڈی جی ریسکیو سیکرٹری ایمرجنسی سروسز ڈاکٹررضوان کا کہنا ہےکہ تین لاکھ بیس ہزار لوگوں کو جب نکالیں اورتین دریاؤں میں بیک وقت سیلاب ہوں،تو اس طرح کےحادثات کے نمبر بہت کم ہیں،جتنی بڑی آفت ہے،اس میں چھوٹے موٹے حادثات ہو جاتے ہیں۔

(جاری ہے)

ادھر دریائے ستلج میں اونچے درجے کی سیلابی صورتحال برقرار ہے، ایمپریس برج کے مقام پر پانی کے بہاﺅ میں تیزی دیکھنے میں آ رہی ہے ریسکیو حکام کا بتانا ہے کہ دریا کا پانی تو والی، خانو والی، بستی جام والا سمیت دیگر بستوں میں داخل ہو گیا ہے، احمد پور شرقیہ کے علاقے پپلی راجن شاہ اور ملحقہ علاقوں میں ریسکیو آپریشن جاری ہے دریائے چناب میں بھی ہیڈ پنجند کے مقام پر انتہائی اونچے درجے کا سیلاب ہے، پانی میں اضافے سے تحصیل علی پور کے مزید علاقے زیر آب آ گئے ہیں. مظفرگڑھ کی ضلعی انتظامیہ کا کہنا ہے کہ سیلاب کے باعث سیت پورشہر کے بیشتر علاقے پانی میں ڈوب گئے ہیں، سیت پور میں ادویات، کھانے پینے کی اشیا کی قلت ہے مقامی انتظامیہ کے مطابق تحصیل علی پور میں بیٹ چنہ، شیخانی، کوٹلہ اگر، مسن کوٹ بھوآ اور شاہ وساوا بھی زیرآب آ گئے ہیں علی پور کے علاقے خیرپور سادات کےبھی کئی علاقے پانی میں ڈوب گئے ہیں، متاثرہ علاقوں میں اب بھی ہزاروں افراد سیلاب میں پھنسے ہیں، ریسکیو آپریشن جاری ہے دریائی پٹی کے 150 کلومیٹر کے علاقے میں 145 موضع جات بری طرح متاثر ہوئے ہیں، ایک لاکھ بیس ہزار ایکڑ سے زائد کھڑی فصلیں ڈوب گئیں، متعدد سڑکیں سیلابی ریلے میں بہہ گئیں، کئی دیہات کا بہاولنگر سے زمینی راستہ منقطع ہے، دریائی بیلٹ میں 34 سکول غیر معینہ مدت کیلئے بند ہیں . متاثرہ علاقوں میں کھانے پینے کی اشیا، ادویہ اور جانوروں کے لئے چارے کی قلت کا سامنا ہے ادھر ملتان کے موضع گردیز پور میں سیلابی پانی سے لاش برآمد ہوئی جس کی شناخت 25 سالہ محمد جعفر کے نام سے ہوئی ہے