محسن نقوی اور طلال چوہدری کی شہید میجر عدنان کے اہلخانہ سے ملاقات، تعزیت کااظہار

جمعہ 12 ستمبر 2025 21:30

اسلام آباد (اُردو پوائنٹ اخبارتازہ ترین - این این آئی۔ 12 ستمبر2025ء)وفاقی وزیر داخلہ محسن نقوی اور وزیر مملکت داخلہ طلال چوہدری بنوں میں فتنہ الخوارج کے خلاف بہادری سے لڑتے ہوئے شہید ہونے والے میجر عدنان اسلم کی رہائش گاہ پہنچے، شہید میجر عدنان اسلم کے والدین اور اہلخانہ سے ملاقات اور اظہار تعزیت کیا۔اس موقع پر محسن نقوی نے کہا کہ آپ کے شہید بیٹے نے بہادری اور شجاعت کی نئی داستان رقم کی، آپ کا یہ حوصلہ اور عزم ہی قوم کی طاقت ہے۔

(جاری ہے)

آپ کی عظمت کو سلام پیش کرتے ہیں۔وزیر مملکت برائے داخلہ طلال چوہدری نے کہا کہ شہید میجر عدنان اسلم قوم کے ہیرو ہیں، عظیم قربانی رائیگاں نہیں جائے گی، شہداء کے خاندانوں کی لازوال قربانیوں کی قوم ہمیشہ مقروض رہے گی۔ اس موقع پر شہید میجر عدنان کے والد اور والدہ نے کہا کہ شہید بیٹے پر فخر ہے، 10 بیٹے بھی ہوتے تو وطن پر قربان کر دیتے۔خیال رہے کہ میجر عدنان اسلم بنوں میں فتنہ الخوارج کے دہشتگردوں کے خلاف بہادری سے لڑتے اور اپنے ساتھی کو بچاتے ہوئے زخمی ہونے کے بعد دوران علاج شہید ہوگئے تھے۔