پاکستان میں سیلاب کی تباہ کاریوں نے لاکھوں افراد کو متاثر کیا ، وزیراعظم

کراچی (اُردو پوائنٹ اخبارتازہ ترین - اے پی پی۔ 12 ستمبر2025ء) ترجمان وفاقی وزارت اطلاعات و نشریات (حکومتِ پاکستان) برائے سندھ، راجہ خلیق الزمان انصاری نے کہا ہے کہ پاکستان میں سیلاب کی تباہ کاریوں نے لاکھوں افراد کو متاثر کیا ہے، وزیر اعظم شہباز شریف اور وزیر اعلیٰ پنجاب مریم نواز خود میدانِ عمل میں موجود ہیں اور متاثرین کی خدمت، ان کی بحالی اور ریلیف کے کاموں کی نگرانی میں دن رات مصروف ہیں، ایسے وقت میں جب پوری قوم اتحاد اور یکجہتی کی متقاضی ہے، پاکستان تحریک انصاف (پی ٹی آئی) اپنے منفی اور ملک دشمن بیانیے کے ذریعے انتشار پھیلانے کی کوشش کر رہی ہے۔

اپنے ایک بیان میں راجہ انصاری نے کہا کہ پی ٹی آئی کی سیاست ہمیشہ دوغلے پن اور تضادات سے بھری رہی ہے، کبھی یہ جماعت امریکہ مخالف نعرے لگا کر عوام کو گمراہ کرتی رہی اور کبھی انہی کے پرچم لہرا کر مدد کی بھیک مانگتی رہی، کبھی ریاستِ مدینہ کے نام پر جھوٹا بیانیہ پیش کر کے عوام کو دھوکہ دیتی رہی اور پس پردہ اسرائیل کو تسلیم کرنے کی سازشیں کرتی رہی۔

(جاری ہے)

راجا خلیق الزمان انصاری نے کہا کہ ۹ مئی کو ریاستی اداروں کے خلاف بغاوت اور ہرزہ سرائی پی ٹی آئی کے حقیقی عزائم کو بے نقاب کر چکی ہے، ان کا اصل مقصد پاکستان کو کمزور کرنا، اداروں پر حملہ آور ہونا اور ملک کو اندر سے غیر مستحکم کرنا ہے۔انہوں نے کہا کہ دوسری جانب وزیر اعظم شہباز شریف نہ صرف سیلاب متاثرین کی خدمت اور بحالی کے اقدامات میں سرگرم عمل ہیں بلکہ بین الاقوامی سطح پر جرأتمندانہ خارجہ پالیسی اختیار کرتے ہوئے پاکستان کو ایک مضبوط، خودمختار اور باوقار ملک کے طور پر دنیا کی صفِ اول میں لا کھڑا کیا ہے خصوصاً اسرائیل کے خلاف پاکستان کے تاریخی اور واضح مؤقف نے دنیا کو یہ پیغام دیا ہے کہ پاکستان اپنی خودمختاری اور اصولوں پر کبھی سمجھوتہ نہیں کرے گا۔

انہوں نے کہا کہ وزیر اعلیٰ پنجاب مریم نواز بھی دن رات عوامی خدمت کے جذبے کے تحت کام کر رہی ہیں، جس کی وجہ سے پاکستان میں وہ حالات پیدا نہیں ہوئے جن کی تحریکِ انتشار خواہشمند ہے۔ انہوں نے کہا کہ مسلم لیگ (ن) کی قیادت اپنی عوامی خدمت، عوامی تحفظ اور ملک کی خودمختاری کے لیے ہر اول دستے کی حیثیت رکھتی ہے اور قوم وزیر اعظم شہباز شریف کی قیادت میں ایک محفوظ اور باوقار مستقبل کی طرف بڑھ رہی ہے۔