Live Updates

رواں ہفتے کے دوران پیاز، ٹماٹر، چینی، انڈے، دالیں، سبزیوں سمیت 25 اشیاء مہنگی ہو گئیں

بیشتر اشیاء مہنگی ہو جانے کے باوجود ادارہ شماریات کا مہنگائی کی شرح میں کمی ہو جانے کا دعوٰی

محمد علی جمعہ 12 ستمبر 2025 19:30

لاہور (اُردو پوائنٹ اخبارتازہ ترین۔ 12 ستمبر2025ء) رواں ہفتے کے دوران پیاز، ٹماٹر، چینی، انڈے، دالیں، سبزیوں سمیت 25 اشیاء مہنگی ہو گئیں، بیشتر اشیاء مہنگی ہو جانے کے باوجود ادارہ شماریات کا مہنگائی کی شرح میں کمی ہو جانے کا دعوٰی۔ تفصیلات کے مطابق ادارہ شماریات نے ہفتہ وارمہنگائی سے متعلق رپورٹ جاری کردی، جس کے مطابق ہفتہ وارمہنگائی کی سالانہ مجموعی شرح 5 اعشاریہ 03 فیصد ریکارڈ کی گئی۔

رپورٹ کے مطابق ایک ہفتے میں 22 اشیاء کی قیمتوں میں اضافہ ہوا، حالیہ ہفتے پیاز 9 روپے 75 پیسے فی کلو مہنگا ہوا، ٹماٹر 21 روپے 47 پیسے، آلو 2 روپے 97 پیسے فی کلو مہنگے ہوئے۔ ادارہ شماریات کے مطابق ایک ہفتے میں ایل پی جی کا گھریلو سلنڈر 93 روپے 14 پیسے مہنگا ہوا، چاول 2 روپے 53 پیسے، انڈے 4 روپے 64 پیسے فی درجن مہنگے ہوئے۔

(جاری ہے)

رپورٹ کے مطابق حالیہ ہفتے چینی 2 روپے 65 پیسے، دال مونگ 5 روپے 12 پیسے، دال ماش 5 روپے 70 پیسے، دال چنا 2 روپے 10 پیسے فی کلو مہنگی ہوئی۔

ادارہ شماریات کے مطابق ایک ہفتے میں لہسن 2 روپے 44 پیسے ، مٹن 2 روپے 5 پیسے فی کلو مہنگا ہوا۔ رپورٹ کے مطابق برائلرمرغی 15 روپے 13 پیسے فی کلو، کیلے 4 روپے 60 پیسے فی درجن سستے ہوئے۔ 20 کلو آٹے کا تھیلا 224 روپے 97 پیسے سستا ہوا، حالیہ ہفتے 4 اشیاء سستی اور 25 اشیا کی قیمتوں میں استحکام رہا۔