اسرائیلی وزیر دفاع کاٹز کا فون ہیک، ترک ہیکر کی ویڈیو کال وائرل

اسرائیلی وزیر دفاع نے نازیبا الفاظ سن کر فورا کال کاٹ دی،غیرملکی میڈیا

ہفتہ 13 ستمبر 2025 15:00

واشنگٹن (اُردو پوائنٹ اخبارتازہ ترین - این این آئی۔ 13 ستمبر2025ء)اسرائیلی وزیرِ دفاع یسرائیل کاٹز کو اس وقت شدید خفت کا سامنا کرنا پڑا جب ایک ترک ہیکر نے براہِ راست ان کے فون نمبر پر رابطہ کر کے مختصر ویڈیو کال کی اور اس کی جھلک سوشل میڈیا پر جاری کر دی۔رپورٹس کے مطابق ہیکر نے جیسے ہی کال کنیکٹ کی تو وزیر دفاع نے جواب دے دیا، لیکن چند ہی لمحوں میں ہیکر نے ان پر نازیبا الفاظ کی بوچھاڑ شروع کر دی۔

جس پر کاٹز نے فورا کال منقطع کر دی۔ ہیکر نے اس چند سیکنڈ کے کلپ اور وزیر کی تصویر انٹرنیٹ پر وائرل کر دی۔

(جاری ہے)

اسرائیلی میڈیا نے اس واقعے کی تصدیق کرتے ہوئے بتایا کہ وزیر دفاع کے فون پر حالیہ دنوں میں مختلف ممالک سے منظم کالز اور دھمکی آمیز پیغامات آ رہے ہیں۔وزیر دفاع کاٹز نے بھی ایکس پر پوسٹ کرتے ہوئے تسلیم کیا کہ کئی گروہ انہیں مسلسل نشانہ بنا رہے ہیں۔تاہم ان کا کہنا تھا کہ وہ دبا میں آنے کے بجائے دشمن کمانڈروں کے خلاف کارروائی کے احکامات جاری کرتے رہیں گے۔یہ واقعہ دوحہ میں حماس کے رہنماوں پر اسرائیلی فضائی حملوں کے صرف دو دن بعد پیش آیا۔یاد رہے کہ اسی ہفتے کے آغاز میں کاٹز نے متنبہ کیا تھا کہ غزہ پر خوفناک طوفان ٹوٹنے والا ہے۔