Live Updates

ملک میں پیٹرولیم مصنوعات کی قیمتوں میں اضافے کا امکان

پیٹرولیم مصنوعات کی نئی قیمتوں کے تعین کیلئے اوگرا 15 ستمبر کو حکومت کو سمری بھجوائے گی

ساجد علی ہفتہ 13 ستمبر 2025 15:02

اسلام آباد ( اردو پوائنٹ تازہ ترین اخبار ۔ 13 ستمبر 2025ء ) ملک میں پیٹرولیم مصنوعات کی قیمتوں میں اضافے کا امکان ظاہر کیا جارہا ہے، اس وقت ملک میں پیٹرول کی موجودہ قیمت 264.61 روپے اور ڈیزل کی موجودہ قیمت 269.99 روپے فی لیٹر ہے۔ میڈیا رپورٹس کے مطابق 16 ستمبر سے ملک میں آئندہ 15 روز کیلئے پیٹرولیم مصنوعات کی قیمتیں بڑھانے کی تجویز زیر غور ہے جس کے تحت پیٹرول کی قیمت میں 1.54 روپے فی لیٹر اضافہ ہوسکتا ہے جب کہ ہائی سپیڈ ڈیزل 4 روپے 79 پیسے فی لیٹرمہنگا کرنے کی تجویز ہے۔

(جاری ہے)

ذرائع کا کہنا ہے کہ 15 روز کیلئے مٹی کے تیل کی قیمت میں 3 روپے 6 پیسے اضافہ ہونے کی توقع ہے، اسی طرح لائٹ ڈیزل آئل 3 روپے 68 پیسے فی لیٹر مہنگا کرنے کی تجویز دی گئی ہے، اس ضمن میں تیار کیے جانے والے ورکنگ پیپرمیں حکومتی ٹیکسز اور ایکسچینج لاسز شامل نہیں ہیں۔ بتایا گیا ہے کہ ملک میں پیٹرولیم مصنوعات کی نئی قیمتوں کے تعین کیلئے اوگرا 15 ستمبر کو حکومت کو سمری بھجوائے گی، جس کے بعد 15 روز کیلئے نئی پٹرولیم قیمتوں کی حتمی منظوری وزیراعظم دیں گے، وزیراعظم کی منظوری کے بعد وزارت خزانہ نوٹیفیکیشن جاری کرے گی۔