Live Updates

پنجاب پولیس کا سیلاب متاثرہ علاقوں میں ریسکیو اینڈ ریلیف آپریشن جاری

ہفتہ 13 ستمبر 2025 19:59

لاہور (اُردو پوائنٹ اخبارتازہ ترین - این این آئی۔ 13 ستمبر2025ء) انسپکٹر جنرل پولیس پنجاب ڈاکٹر عثمان انور کی ہدایت پر پنجاب پولیس کا سیلاب سے متاثرہ علاقوں میں ریسکیو اینڈ ریلیف آپریشن جاری ہے جس کے تسلسل میں اب تک 06لاکھ 93ہزار 706متاثرہ شہریوں کو محفوظ مقامات پر منتقل کیا جا چکا ہے جبکہ سیلاب متاثرین کے 06لاکھ 26ہزار 689مویشیوں کو بھی محفوظ مقامات پر منتقل کیا گیا ہے۔

ریسکیو اینڈ ریلیف آپریشن میں پنجاب پولیس کے 16ہزار سے زائد افسران و اہلکار، 770وہیکلز اور 40کشتیاں حصہ لے رہی ہیں۔

(جاری ہے)

سیلاب زدہ علاقوں سے اب تک 02لاکھ 77ہزار 442مردوں، 02لاکھ 27ہزار 101خواتین اور ایک لاکھ 89ہزار 163بچوں کو ریسکیو کیا گیا ہے۔آئی جی پنجاب ڈاکٹر عثمان انور نے کہا کہ ریسکیو اینڈ ریلیف آپریشن کے دوران سیف سٹی کی تھرمل امیجنگ ٹیکنالوجی اور ڈرون کیمرے استعمال کئے جا رہے ہیں تاکہ متاثرین کی بروقت مدد یقینی بنائی جا سکے۔ ان کا مزید کہنا تھا کہ سیلاب زدہ علاقوں میں پٹرولنگ اور سرویلنس بھی بڑھا دی گئی ہے۔ترجمان پنجاب پولیس کے مطابق ملتان ریجن سے 02لاکھ 95ہزار 480اور ڈی جی خان ریجن سے 95ہزار 204شہریوں کو ریسکیو کیا گیا ہے۔