Live Updates

صوبائی وزیر فضل حکیم خان کا سیدو شریف کا دورہ، علاقہ مکینوں کی جانب سے منعقدہ جرگے میں شرکت

اتوار 14 ستمبر 2025 21:10

پشاور (اُردو پوائنٹ اخبارتازہ ترین - اے پی پی۔ 14 ستمبر2025ء) خیبر پختونخوا کے وزیر برائے لائیو سٹاک، فشریز و کوآپریٹو فضل حکیم خان نے اللہ اکبر کالونی سیدو شریف کا دورہ کیا اور علاقہ مکینوں کی جانب سے منعقدہ جرگے میں شرکت کی۔ جرگہ مشران نے صوبائی وزیر کو اللہ اکبر کالونی سیدو شریف میں گلی کوچوں میں تجاوزات، چھوٹے رابطہ پل کی وجہ سے بارش اور سیلاب کے دوران گھروں میں پانی داخل ہونے، پل کو بڑا کرنے کی ضرورت سمیت دیگر بنیادی عوامی مشکلات سے آگاہ کیا۔

صوبائی وزیر نے ان کے مسائل غور سے سنے اور یقین دہانی کرائی کہ ان مسائل کے حل کے لیے جلد اور عملی اقدامات اٹھائے جائیں گے۔ اس موقع پر چیئرمین حبیب اللہ خان سمیت معززین علاقہ بڑی تعداد میں شریک تھے۔ فضل حکیم خان نے اپنے خطاب میں کہا کہ صوبائی حکومت اپنے منشور کے مطابق عوامی مسائل کے پائیدار حل، بنیادی سہولیات کی فراہمی اور ترقیاتی منصوبوں کی بروقت تکمیل کے لیے پُرعزم ہے۔

(جاری ہے)

انہوں نے کہا کہ عوامی جرگے صوبائی حکومت اور عوام کے درمیان رابطے کا بہترین ذریعہ ہیں اور یہ عوامی شمولیت کی وہ عملی مثال ہے جو ہماری صوبائی حکومت کے وژن اور منشور کی عکاسی کرتی ہے۔ انہوں نے کہا کہ عوامی خدمت کو فرض سمجھ کر جرگے میں پیش کیے گئے تمام مسائل کو ترجیحی بنیادوں پر حل کیا جائے گا تاکہ علاقے کے عوام کو حقیقی ریلیف فراہم کیا جاسکے۔