رومانیہ میں روسی ڈرون داخل، سفیر کی طلبی، شدید احتجاج

روسی ڈرون کی دراندازی ناقابلِ قبول اور غیر ذمہ دارانہ عمل ہے،وزارتِ خارجہ

پیر 15 ستمبر 2025 15:04

بخارسٹ(اُردو پوائنٹ اخبارتازہ ترین - این این آئی۔ 15 ستمبر2025ء) رومانیہ نے روسی ڈرون کی فضائی حدود میں داخلے پر سخت احتجاج کرتے ہوئے ماسکو کے سفیر کو طلب کرلیا۔ یہ واقعہ اس وقت پیش آیا جب روس نے یوکرین پر ڈرون حملے کیے۔رومانیہ کی وزارتِ خارجہ نے بیان میں کہا کہ روسی ڈرون کی دراندازی ناقابلِ قبول اور غیر ذمہ دارانہ عمل ہے جو رومانیہ کی خودمختاری کی خلاف ورزی ہے۔

(جاری ہے)

وزارت کے مطابق ماسکو کو خبردار کیا گیا ہے کہ مستقبل میں اس طرح کی خلاف ورزیاں فوری طور پر روکی جائیں۔یوکرینی صدر ولادیمیر زیلنسکی نے الزام لگایا کہ کریملن رومانیہ کا امتحان لینا چاہتا ہے اور اسی حکمتِ عملی کے ذریعے جنگ کو پولینڈ اور بالٹک ممالک تک پھیلانے کی کوشش کر رہا ہے۔رومانیہ کی وزارتِ دفاع نے کہا کہ روس کے یہ اقدامات بلیک سی خطے میں سکیورٹی اور استحکام کے لیے نئے خطرات پیدا کر رہے ہیں۔