راولپنڈی، زرعی گریجویٹس پروگرام کے پہلے فیز کے انٹرنیز کی الوداعی تقریب کا انعقاد کیاگیا

پیر 15 ستمبر 2025 15:45

راولپنڈی (اُردو پوائنٹ اخبارتازہ ترین - اے پی پی۔ 15 ستمبر2025ء) وزیر اعلیٰ پنجاب مریم نواز شریف کے ویژن کی روشنی میں شروع کیا گیا زرعی گریجویٹس کے لیے انٹرن شپ پروگرام کا پہلا فیز مکمل ہو گیا۔ تفصیلات کے مطابق صوبہ بھر کی طرح راولپنڈی میں بھی وزیر اعلی پنجاب زرعی گریجویٹس کے لیے انٹرن شپ پروگرام کا پہلا فیز مکمل ہو گیا۔انٹرن شپ کا دورانیہ ایک سال تھا۔

انٹرن شپ پروگرام کے دوران زرعی گریجویٹس کو ماہانہ 60,000 روپے کا وظیفہ دیا گیا۔ انٹرز کی الوداعی تقریب میں ڈائریکٹر زراعت توسیع راولپنڈی سید شاہد افتخار بخاری نے انٹرن شپ پروگرام مکمل کرنے والوں میں سرٹیفیکیشن تقسیم کیے۔ اس موقع پر گفتگو کرتے ہوئے ڈائریکٹر زراعت توسیع راولپنڈی سید شاہد افتخار بخاری نے کہا کہ زرعی گریجویٹس کے لیے انٹرن شپ پروگرام وزیرِ اعلیٰ پنجاب مریم نواز شریف کا شاندار پروگرام ہے۔

(جاری ہے)

اس پروگرام سے زرعی گریجویٹس کو عملی طور پر سیکھنے کا موقع ملا اور انکی مالی معاونت بھی کی گئی۔ اس سے شعبہ زراعت کو مذید جدت دینے میں مدد ملے گی۔ اس موقع پر انٹرن شپ پروگرام مکمل کرنے والے زرعی گریجویٹس نے انٹرن شپ پروگرام کو عملی علم حاصل کرنے کا بہترین ذریعہ قرار دیتے ہوئے وزیراعلی پنجاب مریم نواز شریف کا شکریہ ادا کیا۔ انہوں نے کہا کہ وزیر اعلیٰ پنجاب زرعی گریجویٹس انٹرن شپ جیسا پروگرام زرعی شعبے کو عملی طور پر سمجھنے کے لیے سود مند ثابت ہوا ہے۔\378