متحدہ عرب امارات اورپاکستان کا کیش لیس اکانومی کے شعبے میں تعاون کا عمل تیز کرنے پر اتفاق

پیر 15 ستمبر 2025 17:13

دبئی (اُردو پوائنٹ اخبارتازہ ترین - این این آئی۔ 15 ستمبر2025ء) متحدہ عرب امارات اور پاکستان نے کیش لیس اکانومی کے شعبے میں تعاون کا عمل تیز کرنے پر اتفاق کیا ہے ۔یو اے ای اور پاکستان کے درمیان کیش لیس اکانومی کے معاملے پر دوطرفہ مشاورتی اجلاس کا انعقاد کیا گیا ۔یواے ای کے مالی امور کے وزیرمملکت محمد بن ہادی الحسینی اوروزیرمملکت خزانہ بلال اظہر کیانی نے اپنے اپنے ملک کی طرف سے نمائندگی کی ۔

یو اے ای کی جانب سے ڈیجیٹل ادائیگیوں اور وصولیوں سے متعلق تفصیلی بریفنگ دی گئی ۔یواے ای حکام نے ڈیجیٹل معیشت سے متعلق متحدہ عرب امارات کے تجربات پر روشنی ڈالی ۔ پاکستانی ٹیم نے وزیراعظم شہبازشریف کے کیش لیس اکانومی کے تصور کو بیان کرتے ہوئے اب تک کی پیش رفت سے آگاہ کیا ۔

(جاری ہے)

اجلاس میں کیش لیس اکانومی کے مختلف پہلوئوں پر ٹیکنیکل ٹیمز کی سطح پر دونوں ممالک میں تعاون جاری رکھنے پر اتفاق کیاگیا ۔

اجلاس میں ڈیجیٹل اکانومی کے فروغ کے لئے وزیراعظم کے اقدامات زیرغور آئے ۔اجلاس میں یو اے ای اور پاکستان کے درمیان جدید گورننس کے شعبے میں مجموعی تعاون پر اب تک کی پیش رفت کا جائزہ بھی لیا گیا ۔وزیر مملکت بلال اظہر کیانی نے کیش لیس اکانومی سمیت دیگر شعبوں میں نالج ایکسپیرینس ایکسچینج پر یو اے ای کی قیادت اور حکومت کا شکریہ ادا کیا ۔

اجلاس میں یو اے ای کے عالمی مالیاتی امور کے اسسٹنٹ انڈر سیکریٹری علی عبداللہ شرافی ، ڈائریکٹر ثریا حامدالہاشمی اور کابینہ امور کی وزارت کے ابراہیم العالی بھی شریک تھے ۔وزیر مملکت بلال اظہر کیانی کی قیادت میں پاکستانی ٹیم میں گورنر سٹیٹ بنک جمیل احمد، سیکریٹری خزاہ امداد بوسال ، سیکریٹری آئی ٹی ضرار ہاشم ، یو اے ای میں پاکستانی سفیر فیصل ترمزی، دیگر اعلی حکام اور کرانداز کے ٹیم ارکان شامل تھے